Diabierna den e prome minuutnan di Toque de Queda polis a tuma nota di un Honda Accord Blanco riba caminda na Piedra Plat serca di Sero Pita, mesora a bay over na para esaki. E chauffeur di e vehiculo aki no a para y un persecushon a start. Varios patruya a ser poni na altura y a cuminsa un buskeda den e area pa e vehiculo aki. Helicopter di polis tambe a asisti den e buskeda pa esaki. Durante e persecushon e sospechoso a accidenta unda e bumper di e vehiculo a keda atras. E sospechoso a sigui core y dal den un mata di coco chikito keda pega, bandona su vehiculo y drenta mondi. Varios polis na pia y hunto cu ayudo di helicopter di polis a logra encontra y despues di basta esfuerzo detene e sospechoso aki. Vehiculo di transporte a ser pidi na e sitio pa por a transporta e detenido pa warda di polis.
