Rocco Tjon: Desesperacion di Mike Eman y AVP no conoce limite.

Awo cu gabinete Wever-Croes a sera presupuesto 2020 cu un surplus di 29 miyon florin, sin sugar-tax, AVP ta mas determina ainda pa perhudica e pais aki. Un otro motibo dicon AVP ta asina rabia ta paso durante e ultimo reunion cu Parlamento tawatin na WEB diabierna ultimo, a wordo confirma cu dentro di poco lo anuncia rebaho di prijs di awa.

DENUNCIA FALSO

Aworaki cu nos pais ta bayendo den e rumbo corecto y situacion ta drecha nos por tuma nota cu Mike Eman ta laga haci un denuncia falso contra prome minister sra. Evelyn Wever-Croes. Tambe nos por tuma nota cu e biaha aki si Robert Candelaria, cu conoce e aparato hudicial, no a laga su mes wordo uza door di Mike Eman, y e no a bay ministerio publico.

E biaha aki pa manipula pueblo Mike Eman a huza dos candidato di AVP cu conoce retonan intelectual, bou capa di fundacion AVP, pa bay Ministerio Publico. Un fundacion di AVP cu lo bay combati corupcion? Pero e dos caranan aki ta esnan cu a permiti pa un Minister cu ta wordo sospecha di corupcion sigui cobra. Dos cara cu a permiti liderazgo di Mike Eman conduci na e hecho cu awe Benny Sevinger ta wordo sospecha di estafa, soborno, malhuzo di su funcion, falsificacion di documento y labamento di placa. Esaki ta e “legacy” di Mike Eman.

PA CONCLUI

Despues cu Mike Eman tawata presenta presupuestonan ficticio cu cifranan irrealistico, y deficitnan di alrededor di 300 miyon florin awo nos conoce presupuestonan realistico. Presupuesto 2018 a y presupuesto 2019 lo sera “budget-neutraal”. Ta como si fuera cu cada bes cu Aruba haya trankilidad, Mike Eman ta rabia y kier crea descordia den nos pueblo.

Share:

Leave a Reply

Your email address will not be published. Required fields are marked *