Minister di Finansa: Den Gobierno 7.195 hende ta central

Oranjestad – Minister di Finansa ta indica cu e resultado preliminar di e investigacion di IMF riba e gastonan di personal di Gobierno ta indica cu Gobierno ta pagando den 2019 e suma total di 605 miyon florin na 7.195 trahado den sector publico. Esaki ta e suma total cu ta bay pa paga empleado publico y ‘gelijkgestelden’ cu nan salario ta wordo subsidia pa Gobierno. E suma aki ta 12% di nos GDP indicando cu di e esfuerso di full nos Pais (publico y priva), 12% ta bay na pago di salario di e trahador publico.

E mandatario ta enfastisa cu mester na cuenta cu di un Presupuesto 2019 aproba pa Parlamento cu 1.423 miyon florin na entrada, 605 miyon florin ta bay paga e trahador publico y 232 miyon florin ta bay na pago di interes. Esey ta nifica cu ta resta solamente 586 miyon florin pa paga pa tur otro necesidad cu tin pa entre otro salubridad, enseñansa, seguridad, infrastructura, comunicacion y medio ambiente.

Si nada no wordo haci na aña 2020 e gastonan di personal lo bira 626 miyon florin, cual ta nifica un subida di 3.4% compara cu aña 2019.

E informacion di e resultado preliminar aki ta masha importante ya cu Gobierno ta haya un bista amplio y concreto con e situacion ta y kico mester haci pa mitiga e gastonan pa asina por tene e gastonan manehabel y pagabel.

Minister Ruiz-Maduro ta comparti e resultadonan preliminar aki cu pueblo di Aruba y trahadonan den sector publico pa por haya un bista di e gastonan di personal di e aparato publico.

E mandatario ta enfatisa cu Gabinete Wever-Croes  ta trahando seriamente pa atende e gastonan di personal den sector publico y cu Gobierno ta tuma decisionnan cu ta  responsabel pa nos Pais Aruba.

Gobierno mester di comprendimento pa cu situacion financiero y tur hende di bon boluntad mester por compronde cu e espacio pa crece gasto di personal ta hopi pero hopi limita. 

Share:

Leave a Reply

Your email address will not be published.