Diaranson por a tuma nota cu Ministerio Publico a detene ex minister y actual candidato pa partido AVP señor Benny Sevinger. Esaki relaciona cu e caso Avestrus, despues di a detene varios persona sospecha di ta su complice den caso di corupcion, labamento di placa y falsificacion di documento. Esakinan ta acusacionnan grave contra un politico y ex minister. Prome Minister Evelyn Wever-Croes riba esaki a declara:
“Locual cu mi ta lamenta ta cu den su desesperacion e ta acusa ami di a bende un tereno pa 17 miyon dollar. E acusacion aki ta totalmente falso. Ami nunca tabata tin otro propiedad cu esun cu mi ta biba aden y nunca mi a bende ningun otro propiedad y sigur no pa un suma di placa asina. Ademas, Benny Sievinger a wordo deteni pa corupcion y si su unico defensa ta pa acusa un otro hende, ta hopi tristo mes”, Prome Minister a enfatisa.
Por a tuma nota cu Partido AVP tin algun dia caba ta lansa mentiranan den direccion di nos Prome Minister. Siman pasa tabata e candidato di AVP Selene Kock cu a gaña cu Prome Minister a yama Hulanda p’e, siendo cu nunca Prome Minister a haci tal yamada. Despues candidato di AVP Gerlien Croes a gaña cu Hulanda no a exigi cortamento di 5 miyon florin tur luna den cuido di salud siendo cu tur documento ta prueba esey. Despues tambe, e matutino Awe Mainta liga na AVP a gaña cu Prome Minister no kier a ricibi señor Pisas siendo cu señor Pisas nunca a pidi un cita cu Prome Minister.
Hasta Mike Eman a acusa cu ta Prome Minister a manda polis para su actividad cu a sali for di man siendo cu e sa cu ta e mes a viola tur regla y cu Cuerpo Policial ta actua independiente. Y awor ta Benny Sevinger ta sali gaña cu Prome Minister a bende un propiedad pa 17 miyon dollar.
“Ademas, si di berdad e tin un prueba contra mi, puntra bo mes dicon nunca e mes no a entrega prueba. Bo sa dicon? Pasobra Sevinger sa cu e ta gaña. Esaki ta simplemente un mentira mas. Ban wak ta cu cua mentira nan ta bin cu n’e mayan”, Prome Minister a bisa.
Prome Minister a pidi su abogado pa entrega keho penal contra di Benny Sevinger pa “smaad en laster” pasobra e no ta acepta e acusacion aki.
