PARTIDONAN MEP Y RAIZ A FIRMA DECLARACION DI INTENCION PA FORMACION DI GOBIERNO 2021-2025

Diahuebs 8 di juli, Partido MEP y Partido Raiz a yega na un acuerdo pa sigui negocia pa yega na un coalicion entre e dos partidonan. Mesun diahuebs durante dia, lidernan di e dos partidonan aki a reuni cu e informadornan sr. Werleman y sra. LaSorte na unda nan a firma un declaracion di intencion pa negocia y yega na un coalicion.

Lider di MEP, Evelyn Wever-Croes a expresa cu Partido MEP y Partido Raiz tin suficiente similaridadnan pa traha riba e base pa goberna Aruba pa e siguiente 4 aña nos dilanti. Siendo Aruba ainda den pandemia, e dos partidonan a haya otro den liña grandi pa asina hunto saca Aruba padilanti pa un Aruba mas fuerte y resiliente.

Dilanti un grupo grandi na El Faro Lighthouse, e partidonan a firma un otro convenio, un declaracion na unda partidonan ta declara nan intencion pa forma un gobierno hunto. E declaracion ta contene acuerdonan di gobernacion bou di cua e coalicion aki lo bay traha pa e proximo temporada formando asina Gabinete Wever-Croes 2. E puntonan principal menciona den e declaracion di intencion aki, ta loke cu e partidonanlo basa e negosacionnan pa forma un gobierno solido. E puntonan aki ta di prioridad pa ambos Partido cuanan ta;

1. Integridad;

2. Acuerdonan cu Hulanda;

3. Recuperacion economico;

4. Finansas publico balansa;

5. Desaroyo sostenibel y medio ambiente;

6. Derechonan social, cuido di adulto mayor, nos mucha y hobennan poniendo e ser humano central

“Nos ta kere cu 11 asientnan aki  ta suficiente amplio pa trece stabilidad cu mester pa goberna nos país”, Lider di MEP, sra. Evelyn Wever-Croes a expresa.

Share:

Leave a Reply

Your email address will not be published. Required fields are marked *