Accidente entre 4 vehiculo cu 4 hende herida pariba di rotonde Tanki Flip

Diasabra marduga a drenta informe di un accidente pisa entre 4 auto cu personanan herida pariba di rotonde Tanki Flip. Mesora a dirigi tanto polis, ambulans y tambe brandweer na e sitio. Na yegada di patruya na e sitio a bin constata cu aki ta trata di 2 accidente tras di otro. Aki un KIA Sportage blanco lo a subi caminda sin duna preferencia y bay dal den un Hyundai Veloster cora bayendo pariba riba caminda grandi. E Hyundai Veloster a baha caminda para na banda y e KIA Sportage a keda mey mey caminda. Un Toyota Tundra tambe bayendo pariba cu velocidad halto lo no a para na tempo y a dal tras di e Sportage mandando e den trafico contrario. Aki un Jeep Cherokee a purba baha caminda pa desvia e impacto pero esaki tabata invano debi na e velocidad y e direccion di e impacto. Tur 4 chauffer a resulta herida. Ambulans a presenta na sitio pa brinda asistencia medico y transporta e heridonan pa hospital. Brandweer a bini na e sitio pa por controla e estado di e vehiculonan pa esaki no forma peliger na e sitio.

Share:

Leave a Reply

Your email address will not be published. Required fields are marked *