Diamars atardi banda di 6’or Guarda Costa a ricibi un yamada for di cuerpo policial di cu algun persona cu tabata busca cocolishi a cay den lama bruto na costa nort na Watamula. Di e cinco personanan cu a cay den lama 3 di nan a logra subi na e barancanan pero dos otronan si no a logra subi bek y a keda den lama. Pa cual motibo polis a avisa Guarda Costa. E Centro di Operacionnan Maritimo di Guarda Costa mesora a dirigi un helicopter pa Watamula pa rescata e dos personanan aki mas pronto posibel for di e lama bruto. Na nan yegada e tripulacion di e helicopter a saca e dos personanan for di awa, un muhe, a perde conocemento, e otro, un homber, tabata consciente. Ambos a ser hiba na e punto di apoyo di Guarda Costa na Hato, unda dos ambulance tabata warda nan.