Dia 16 di december 2025 mi interes a wordo hala pa scucha e parti dje programa di ENFOKE cu tabata fulmina contra FCCA, DIP y pa motibo di ignorancia, tambe contra e Instituto di Kadaster.

Un Kadaster ta un instituto cu pa medio di registronan y mapa ta mantene tur derecho hudicial di propiedad riba biennan inmobil. Kadaster ta reconoce tur derechonan cu ta registra riba un propiedad, pero no ta garantisa cu no por tin otro derechonan cu no ta registra riba e propiedad. Si mi a scucha bon e fulminacion tabata pasobra varios ciudadanonan a cumpra un cas di FCCA, a cumpli completamente cu pago dje cas, pero e traspaso huridico nunca a wordo realisa door di FCCA. Den henter e manipulacion aki Kadaster no tin arte ni parti. Esnan responsabel ta DIP (Domeinbeheer), FCCA y gobierno di Pais Aruba.

Lagando esaki meymey con gobierno (DIP) a asigna e tereno na FCCA pa desaroya y construi casnan social, e casnan a wordo construi riba tereno cu factualmente y huridicamente tabata di gobierno (domeingronden). Un bes cla, e casnan a wordo asigna na ciudadanonan cu tabata den necesidad di un cas y cu e posibilidad cu e ocupante por cumpra e cas. Y den ehecucion di esaki, cos a cuminsa bay fout.

Lagando meymey kico e contract entre FCCA y e ocupante/cumprado ta bisa, FCCA, mientras nan sa miho, a actua manera un negoshi di aparatonan domestico na unda un individuo bao un contract (huurkoop) ta cumpra un aparato y ta paga un suma di placa te ora e cumpli totalmente cu e suma menciona den e contract; e ta haya e declaracion cu tur cos ta paga y na e momento ey e ta legalmente doño dje aparato. Pero den caso di cumpra un cas bao huurkoop, na final cu e cas ta totalmente paga e ta factualmente dje cumprado, pero no huridicamente  pasobra aki mester cumpli cu reglanan stipula den e Codigo Civil di Aruba (BWA).

Tin diferente manera con e cumprado por a haya e cas legalmente na su nomber, pero den tur e maneranan Kadaster lo surgi ora cu sea DIP (lesa gobierno), e doño factual of FCCA haci un peticion pa midi. Kadaster ta un departamento cu ta duna servicio riba peticion. Si no haci un peticion y mustra kico mester wordo midi, Kadaster no por midi. Empleadonan di Kadaster no ta adivinonan (waarzieners). E miho manera legal, foi hopi manera legal, lo tabata si e proyecto a cana di siguiente manera y den un tempo cortico despues cu e cas tabata paga:

1. Domeinbeheer ta entrega un plan di desaroyo (verkavelingsplan) na Kadaster, acompaña pa un peticion pa Kadaster marca y midi e perceelnan;
2. Kadaster ta marca y midi nan, pone nan riba e mapa kadastral y haci e cambionan den e registronan relativo;
3. Ora cu e cumprado tin e cas ful paga, e ta bay Kadaster pa busca un copia anex un descripcion dje perceel;
4. Na Domeinbeheer, cu e comprobante adkiri foy FCCA y e documentonan di Kadaster e ta haci e areglonan necesario pa e traspaso;
5. Acudi na un notariado pa e traspaso.

 

E programa ENFOKE debe Kadaster por lo menos un disculpa.

Ademas, e ciudadanonan cu tabatin añanan ta warda a spaar placa, pasobra tur e tempo nan siguramente no a paga erfpacht y tampoco grondbelasting.

Cordial saludos,

Vivienno Frank Sr.