Calabas/Kudawecha – BREAKING NEWS BREAKING NEWS! NOTICIA DI ULTIMO ORA! Si, shonnan amante di domino estilo “kibra stoel”, awe ultimo ora a cay noticia na mesa di redaccion cu awe nochi, diasabra 21 di maart, cuminsando pa 8’or di anochi, lo bay tin un sambombaso di encuentro di domino entre dos ekipo cu pa hopi tempo caba ta rivalnan eterno! E lugar dje bataya aki claro lo ta n’e incomparabel y sumamente distinguido Domino Square Garden, aya net n’e grens entre Kudawecha y Calabas. Esaki pa añanan largo caba conoci como e unico palacio di pega piedra caminda entrada semper ta gratis y durante halftime e pasapalonan ta skeiro rond completamente por nada!

Cua t’e dos ekiponan cu lo enfrenta otro awe ’nochi? Nada menos cu e gang di Biba Lekker DT, kendenan lo durf di enfrenta e “Chuck Norrisnan” di Sero Blanco DT! Un berdadero sambombaso caminda sigur sigur un tabla lo bula bay halto. Dos ekipo cu ta igual den caliber halto di domino y cu a dicidi di midi forsa un biaha mas contra otro den nan rivalidad eterno. Pues shonnan, bini uno bini tur, awe 21 di maart, cuminsando pa 8’or n’e mundialmente famoso Domino Square Garden, e bataya entre Sero Blanco DT contra Biba Lekker DT! Yegaaa!