Durante dos dia intenso di intercambio y colaboracion, riba 27 y 28 di mei, Aruba Tourism Authority (A.T.A.) a tene su Global Marketing Meeting (GMM), unda ekipo local, hunto cu e ekiponan di Europa, Latino America y Estados Unidos, a reuni pa presenta, dialoga y alinia riba e prioridadnan cu ta forma e futuro di turismo di Aruba. E reunion anual aki ta un momento clave pa dialogo habri, brainstorming y discusion profundo, cu como meta final yega na un bista mas cla y comparti riba e direccion strategico di A.T.A. incluyendo cambionan cu lo sigui.
Turismo Responsabel
Un elemento central di e reunion tabata e cambio cla den nos strategia di comunicacion y posicionamento den tur mercado: un cambio consciente pa turismo responsabel, cual a lansa den un forma mas grandi aña pasa. A.T.A. ta orguyoso di e pasonan y esfuersonan cu ta priorisa turismo responsabel, tanto riba nos isla como den nos mercadonan internacional. Mester menciona cu a presenta diferente iniciativanan di marketing cu ta pone enfasis riba respet, proteccion, preservacion y balans, cu campañanan manera “When You Love Aruba, It Loves You Back” y pa e region Latino Americano “Cuando Amas Aruba, Aruba Te Ama”. E campañanan aki ta inspira y educa bishitantenan pa conecta mas profundamente cu Aruba, trata nos isla cu amor y consciencia, promoviendo comportacion responsabel y respetuoso durante nan estadia na Aruba.
Localmente, A.T.A. ta sigui cu iniciativanan dirigi na tur cu ta yama Aruba cas, manera BanSerio, un programa enfoca riba nos comunidad local cu e obhetivo di educa y crea conscientisacion riba e influencia, comportacion y accionnan di cada ciudadano, pa contribui activamente na un Aruba mas responsabel y sostenibel. Ademas, e campaña Aruba Limpi ta crea consciencia riba e importancia di un Aruba mas limpi como un responsabilidad comparti, mientras cu e ta provee na comunidad un manera structura pa separa y deposita desperdicio na un manera responsabel. A comparti concepto di campaña nobo cu lo lansa localmente pronto y a delinea con lo bay pone mas atencion riba comunica cu e huesped ora e ta riba nos isla, alinia cu e turismo efectua responsablemente.
Tambe a pone atencion riba tur nos esfuersonan dirigi riba desaroyo di nos producto turistico, reconociendo cu e calidad di nos destino ta conecta directamente cu e bienestar di nos comunidad. Durante e sesionnan, tambe a trata e colaboracionnan importante cu partnernan local, manera Aruba Conservation Foundation, Comite Olimpico Arubano, Colegio EPI y EPB, entre otro. A.T.A. ta sigui enfoca asina riba e ‘Aruba Dushi pa Biba, ta un Aruba Dushi pa Bishita’, unda ta fortalece desaroyo comunitario, educacion, cultura, deporte, siguridad, proteha nos naturalesa y mas, sigurando cu e beneficio di turismo ta sirbi nos comunidad y nos huespednan.
Proyeccion pa 2026
E ekiponan internacional di A.T.A. a presenta nan proyeccion pa 2026 y 2027 (pa algun indicador), compartiendo un bista general riba oportunidadnan y strategia pa e aña cu ta bin. E discusionnan tabata dinamico y interactivo, cu amplio espacio pa pregunta, reflexion y aliniacion, loke a haci e GMM un plataforma fuerte pa defini direccion y tuma decisionnan clave.
Na final, e Global Marketing Meeting a confirma cu A.T.A. ta sigui scucha, y tende tur bos y input pa cu e direccion presente y esun di futuro pa cu Aruba su turismo. Tur bos kiermen esun di e residente y e huesped. Esaki cu un sentido fuerte di responsabilidad y teniendo na cuenta cu e bienestar di turismo ta keda un responsabilidad di un y tur. Esaki no ta den man di A.T.A. so, pero A.T.A. lo sigui traha cu dedicacion y pasion.
