A.T.A. ta comparti resultado di september 2026

Alabes ta comparti resultado di estudio tocante Aruba como destinacion pa casamento
Aruba Tourism Authority (A.T.A.) a laga realisa e estudio “Saying ‘I Do’ to the Business of Aruba
Weddings” pa analisa e mercado di casamento y luna di miel, e preferencianan di parehanan y e impacto
economico cu e industria aki por genera. E estudio ta mustra cu Aruba tin cualidadnan fuerte manera
ambiente romantico y exclusivo, luganan unico, siguridad, clima confiabel y un industria di casamento cu
añanan di experiencia, cu hotelnan y profesionalnan estableci cu ta brinda un servicio profesional y
confiabel.
E resultado ta indica un oportunidad importante pa Aruba sigui crece den e mercado aki. Un pareha di
casamento ta gasta un promedio di USD 27.000, mientras cu cada invitado ta gasta aproximadamente
USD 4.000 y un biahero di luna di miel un promedio di USD 10.500. Ademas, e estudio ta mustra cu
casamento moderno ta inclui mas actividad durante varios dia, creando oportunidad pa acomodacion,
gastronomia, excursion, transporte y otro servicio local.
Sostenibilidad ta presenta otro oportunidad importante pa Aruba. E estudio ta mustra cu parehanan ta
duna balor na sosten pa comunidad local, proteccion di medio ambiente y respet pa cultura local, mientras
cu parehanan cu mayor poder di compra ta dispuesto pa paga entre 30% y 50% mas pa opcionnan
sostenibel cu ta substancia y ta haci impacto. Esaki ta brinda Aruba oportunidad pa sigui desaroya e
industria di casamento di manera cu ta crea balor tanto pa e bishitante como pa nos isla. Asina, Aruba por
sigui fortalece su posicion como un destinacion atractivo pa casamento, combinando calidad,
sostenibilidad y e experiencia unico cu nos isla tin di ofrece.
ESTADISTICANAN CONFORME ACTUALISACION DEN E INDUSTRIA DI TURISMO
STAYOVER, ESTADIA Y PARTICIPACION DI MERCADO
Den luna di september 2026, Aruba a ricibi un total di 114.517 bishitante stayover y a registra 761.557
nochi di estadia, cu un promedio di estadia (Average Length of Stay – ALOS) di 6,7 anochi.
E distribucion di mercado durante september a mustra cu Norte America ta e mercado principal,
representando 64,6% di tur yegadanan. Sur America a contribui cu 27,7%, Europa cu 5,0%, mientras cu
otro regionnan a representa 2,7% di total di bishitantenan. Estados Unidos tabata e mercado individual
mas grandi pa e luna di september cu 70.682 bishitante, mientras cu Argentina a registra 14.986
bishitante. Hulanda a lidera e mercado Europeo cu 2.769 bishitante.
SHORT-TERM VACATION RENTALS (STVR)
A.T.A. ta sigui monitorea e sector di Short-Term Vacation Rentals (STVR) pa medio di e plataforma
Lighthouse. Pa september 2026, e nivel promedio di ocupacion a registra 51%, mientras cu e Average
Daily Rate (ADR) pa e luna tabata USD 323. Ademas, e sector a genera un entrada total di USD
24.657.396 durante september 2026.