Un aporte rapido y eficiente na e sector cultural den crisis di COVID19
ORANJESTAD – Recientemente Minister Maduro a reuni cu e directiva di UNOCA pa asina por haya un bista di e programa UNOCA-Cares cual den momento di e crisis di COVID19 a brinda un Aporte Rapido y Eficiente na e Sector cultural di Aruba.
A pone Afl. 2.000,00 disponibel pa proyecto
E programa UNOCA CARES a brinda e oportunidad na tur persona cu tin un idea pa ehecuta un proyecto cultural pa esaki wordo financia cu un suma fiho di Afl. 2.000,00. Pa un persona por a haya e aporte aki a fiha algun rekisito/condicion cual tabata, entre otro, cu e proyecto of idea mester ta uno accessibel pa un publico grandi (comunidad general di Aruba) y fomenta inclusion. E proyecto mester tin balor agrega na e desaroyo cultural di Aruba, mester ta di bon calidad y ta relevante pa e comunidad Arubano. Ademas e proyecto mester a cay bou di un of mas di e siguiente terenonan cultural: Herencia Cultural (Tangibel y Intangibel), Arte di tarima, musica y celebracion, Arte Visual y Artesania, Idioma y Literatura, Audio-Visual y Medianan interactivo, Diseño (moda, grafico, etc.) y preferibel mester haci uso di e idioma Papiamento. E mester ta un video di maximo 5 minuut.
25 proyecto a keda aproba
Di e yamada na publico pa entrega proposicion pa proyecto, UNOCA a aproba 25 proyecto cu ta suma Afl. 50.000,00 cu a wordo inyecta den e sector artistico cultural Arubano den un periodo relativamente cortico. Algun di e proyectonan cu a resalta y cu ya por wordo aprecia via medianan social, ta e Video-Poetry di Levy Geerman y e team di Povi-Tree titula ‘Speranza,’ e cancion ‘Baile di Awacero’ di Reno Steba y Oruba, y siguramente e mini busto den bronze di Sra. mr. Evelyn Wever-Croes como e prome Minister Presidente femenino di Aruba, traha pa e artista Gilbert Senchi.
Un bunita aporte cultural na comunidad
Minister di Cultura Sra. Xiomara Maduro ta gradici UNOCA y ta yama danki na tur artista cu a haci uso di UNOCA CARES pa expone y comparti nan creatividad na momento cu nos Pais ta den crisis. Arte sigur ta brinda speransa y aliento, y ta yuda hende surpasa momentonan dificil. Minister Maduro ta invita tur hende pa admira e proyectonan via e Facebook di UNOCA y di e artistanan mes. Pronto UNOCA lo comparti e proyectonan via radio y television pa deleite di e Pueblo en general.
