Aruba a briya den e 10 muhernan mas bunita di mundo
ORANJESTAD – Diaranson atardi Minister di Cultura, Xiomara Maduro, tabata tin e honor di ricibi srta. Thessaly Zimmerman, Miss Universo Aruba, na su yegada for di Israel despues di a participa na e di 70 edicion di Miss Universo.
Tabata un merdia caminda emocionnan tabata halto pa cu su yegada despues cu Thessaly a logra keda entre e 10 finalistanan di e certamen di Miss Universo cu a conta cu participacion di no menos cu 80 candidata. E anochi di e certamen aki tabata uno unico riba su mes caminda cu Thessaly a sa di sobresali ariba un di e tarimanan di beyesa mas grandi di mundo. Mester menciona cu e anochi final a conta cu 2.7 miyon di televidente cu a scucha Aruba su nomber resona entre e 10 finalistanan.
Pa Minister Xiomara Maduro, esaki ta un logro grandi pa Aruba caminda cu nos como isla chikito, atraves di Thessaly, a bira mas conoci rond mundo. Minister Maduro a sigui bisa cu Thessaly como persona a sa di demostra cu ora cu bo tin disciplina, consistencia, determinacion y mas importante, humildad, bo ta logra tur loke cu bo propone bo mes. Minister Maduro ta gradici Thessaly pa su tremendo presentacion na Miss Universo y ta gradici’e pa ta un digno representante y embahador di nos Pais.
