Como tradicion, anualmente SV Aruba Juniors ta reconoce y brinda homenahe na deportsitanan cu a destaca. E aña aki no ta un excepción y Aruba Juniors tin e placer di participa cu e aña aki a toca Sr Urbano Kock pa ricibi su homenahe.
Urbano a nace na Aruba dia 25 di mei 1945. E ta casa cu nos Miembro di Honor Prisca Kock y tin dos yiu muhe, Gwendoline y Melissa Kock.
Urbano ta miembro di Aruba Juniors y wordo eligi como miembro di directiva na 2 ocacion.
Na aña 1963 Urbano a cuminsa hunga futbol pa junioren di Dakota. E tempo ey nan tabata train unda antes tabata little league ballpark.
Na 1964 Urbano a forma parti di seleccion junioren di Antiyas cu a participa na e weganan Centro Americano y del Caribe na Guatemala. Aki nan ta logra medaya di brons.
E mes un aña Urbano a cuminsa hunga den Hoofdklasse di Dakota. Durante e periodo aki Urbano a hunga 4 copa Antiyano cu Dakota y a hunga na Valencia Venezuela y na Medellin Colombia. Cu Dakota Urbano a sali campeon di Aruba 5 biaha. Un di nan campeon invicto.
Pa motibo di trabou Urbano a stop di hunga pa Dakota na aña 1970. Na 1967 Urbano a drenta servicio di gobierno na “prison na Dakota” como “aspirant gevangenbewaarder.. Despues di 33 aña di servicio Urbano a baha cu pensioen na aña 2000.
Despues di algun aña inactivo Urbano a cuminsa hunga bek cu e team veterano comercial di Flor di Oriente. Despues El a bay hunga pa Roma unda el a hunga den e liganan 35, 40, 50, y 60. Den su tempo cu Roma, Urbano a sali campeon mas di 20 biaha den e diferente divisionnan.
Urbano tabata den servicio militar obligatorio na Corsou na 1965. Aki el a hunga den Campeonato prome division hunto cu su compañeronan hulandes.
Urbano te ainda ta hunga futbol. Tur diaranson cu su team INRO nan ta hunga “wandel voetbal” na RCA. INRO ta un team forma pa hungadornan di Inter y Roma.
SV Aruba Juniors ta contento di por honra nan miembro diabierna awor riba 18 di maart cu ta dia di nos Himno y Bandera. Miembronan di Aruba Juniors y comunidad henter ta keda cordialmente invita na e dia special aki riba cual pa 2or di atardi e homenahe lo tuma lugar.
