Aruba Juniors cu homenahe na Erwin Croes riba dia di Himno y Bandera.

Riba 18 di maart un biaha mas Aruba Juniors lo homenagea deportistanan cu a marca historia na Aruba. E aña aki a toca turno na otro baluartde di deporte Sr Erwin Croes.

Erwin Croes a nace na Aruba dia 9 di april 1962 y a lanta den e bario di Piedra Plat. Win tin dos yiu Gilliany y Djurwin.

Cu 6 aña Win a cuminsa train futbol na Britania. Na 1975 win a hunga su prome campeonato den aspirant pa Britania y a  hunga futbol te cu A-klas. Cu Britania Win sali campeon di A-klas.

Na aña 1990 Win tabata e unico hungado di A-klas cu a forma parti di seleccion di Aruba den e Shell Caribbean Cup cu a tuma luga na St Maarten. Tambe Win a hunga zaalvoetbal varios aña pa Caiquetio y a sali campeon den diferente division.

Den añanan 80 Win a practica boxeo cu Nemencio Croes. El a bringa varios pelea amateur y nunca a perde un pelea.

Cu su 11 aña Win a cuminsa hunga baseball pa Liptons Tea. E aña siguiente Win a pasa pa Aruba Lions bou maneho di Jule Van der Biezen y Nadeis Reyes. Despues di algun aña inactivo na 1981 Win ta bay train cu Charlie Stars. Na 1982 Win a drenta Marloboro den A-klas. Despues di dos aña Win a subi Dobble A unda cu e tabata mag di hunga algun innng. Na 1986 Win a bira hungador regular di Marboro hungando e posicion di outfielder.

Cu Marlboro Win a participa na Sprintraining na Sarasota USA, na Hulanda den e World Port Tournament y Haarlemse Honkbal Week. Tambe den un torneo na Tennessee unda nan sali sub campeon.

Na Corsou Win a hunga cu Marlboro den e Torneo Willie Pieters contra teamnan manera Blue Hawks, Royal Scorpions, Santa Maria. Nan a sali campeon di e torneo.Cu Seleccion di Aruba Win a hunga na Guatemala pa clasifica pa Panam games na Cuba y despues na Weganan Panamericano na Havana Cuba. Tamba Win a hunga na Barinas Venezuela.

Na 1985 Win a cuminsa hunga softball pa Wind Hill Tigers y despues pa Ballentine Casa Haime. Aki el a hunga te ora el a retira na ana 1995.

Un dia haciendo compras el a topa cu Robby Arambatzsis kende a invite pa bin hunga cu Aruba Juniors. E prome campeonato cu Win a hunga pa Aruba Juniors nan a sali campeon invicto. E mes un ana ta sali campeon na Corsou den un torneo contra e campeonnan di Corsou. Cu Aruba Juniors Win a hunga varios biaha na Corsou y un biaha na Medellin Colombia. Na Colombia Win a bati di 4-4 cu 4 doblete.

Cu e trayectoria aki sigur Erwin Croes ta laga su stempel atras como deportista. Diabierna 18 di maart pa 20r di merdia na Aruba Juniors directiva, miembronan y amigonan lo honra Erwin Croes pa su logronan Deportivo. Aruba Juniors ta extende un cordial invitacion na henter e pueblo di Aruba pa bin pasa un Dia Nacional yen di ambiente Deportivo cu ta cuminsa for di 9.30 di mainta y lo culmina den oranan di atardi.

Share:

Leave a Reply

Your email address will not be published.