En conexion cu dia di Himno y Bandera 2022

ORANJESTAD: Diahuebs den oranan tempran di mainta Minister Endy Croes a sigui bishita e scolnan rond di Aruba den cuadro di celebracion di Himno y Bandera. Conhuntamente cu Prome Minister di Aruba Evelyn Wever – Croes y Parlamentario Alvin Molina, e Mandatario a bishita St. Paulus School. Na yega nan a wordo ricibi un caluroso bon bini pa cabesante di e scol Randy Arends. ‘Bo por a sinti e entustiamo cu tabata reina y e alegria di e muchanan’, e Mandatario a expresa.

E mainta a cuminsa cu un bunita ceremonia unda a hisa e bandera di Aruba y a canta Himno di Aruba. Canto y baile a keda presenta pa e alumnonan y un baile sorpresa presenta pe docentenan. Despues e Mandatario a bishita cada klas cu a prepara un bunita exposicion di Aruba, desde cu Aruba a ‘nace’ te cu awo, y presenta pe alumnonan mes. Minister Endy Croes a sigui bisa un exposicion masha bunita yena cu nos historia y creatividad di e muchanan.

Minister Endy Croes ta gradici e cabesante Randy Arends, docentenan y specialmente e alumnonan pa e bunita recepcion. Alabes felicita docentenan di St Paulus, alumnonan y tambe mayornan cu a yuda pa un bunita exposicion.