Pero prome un tiki historia di e burico

E prome buriconan a yega Aruba for di Spanja fin di anja 1400. Paso no tawata tin niun modo di transportacion riba Aruba, buriconan a wordo importa pa hasie e trabao aki transportando hende y producto. Den comienso di siglo 20 tawata tin como 1400 burico riba nos isla. Te ora cu auto a yega Aruba y no tawata tin uso mas pa e burico. Y a laganan los den cunucunan. Door di e popularidad di auto den anjanan 50, asina hopi tawata tin riba Aruba cu auto a bira un peliger pa e buriconan. Door di accident di auto y medida di gobierno e number di buriconan a baha te na 20 den anjanan 1970. Pero poco poco e cantidad di buriconan a cuminsa subi. Den anjanan 90 tawata tin como 100 burico, y Bambam ta un di nan. Bambam a sufri hopi ora muchanan a tira awa cayente riba dje. Ramon Boekhoudt a haya duele di dje, pone bao di un palo pa trata su heridanan y asina e Sanctuario di Burico a nace. A recauda fondo door di campanja y boluntarionan a cuminsa bini pa yuda hasi un tereno limpi na St. Lucia pa hospeda e buriconan. Na anja 1997 tur cos a keda kla y “Ezelopvang Aruba” a wordo oficialmente registra na Camara di Comercio.

A piki e prome 10 buriconan na Pos Chikito y poco poco a piki e restonan. Na comienso a scohe solamente buriconan malo cu malesa of cu herida pero despues esunan “gezond” tambe tawata bai. Trafico riba nos isla a bira alarmante y tawata mucho peligroso pa e buriconan kanando los.

Na anja 1998 Desiree Eldering a cuminsa como un boluntario na e Sanctuario. E tempo ei e Sanctuario no tawata habrie pa publico. Anja 2004 a dicidi pa habrie y asina bishitantenan por a drenta. Na comienso a habrie mainta so pero den anja 2010 a habrie merdia tambe. Awendia mas cu 30,000 hende ta bishita e Sanctuario.

Desde anja 2006, miembronan di Directiva y boluntarionan a cuminsa hasi un tereno na Bringamosa limpi pa den futuro muda e buriconan for di St. Lucia ya cu esaki a bira mucho chikito pa tur e buriconan. Porfin na anja 2016 a muda e buriconan pa e lugar nobo cu ta mas espacioso.  Awor aki nos ta cuida 127 burico, di esaki 6 burico ta biba na cas di Desiree. E seisnan aki nos ta yamanan e “problem children”, ya cu nan tin mester mas atencion y cuido, y no ta sali cu otro buriconan of hende. E Sanctuario su “huesped” mas biew ainda ta Bambam….still going strong!!!!

A construi na Bringamosa un paar di apartaments pa nos boluntarionan cu ta bin for di exterior. Boluntarionan local ta ongeveer 30, pero tambe ta bin boluntario fe rond mundo trahando pa diferente organisacionan. Nan ta keda aki fe 2 pa 12 luna y ta traha na e Sanctuario diaramente cuidando y tambe sinjando con pa trata e buriconan.

Tin como 40 burico kanando los riba nos isla y nos doel ta pa un dia tur e buriconan ta den e siguridad di e Sanctuario. Door di “inbreeding” tur e machonan akiden a wordi castra. A lanta un programa cu otro islanan pa trese burico macho Aruba pa asina raza cu esunan aki pa aumenta nos populacion. Pero door di Covid tur cos ta atrasa. No tin nada mas dushie pa waak  babynan burico coriendo y hungando cu otro na Bringamosa. Un dia nos lo logra!!

Share:

Leave a Reply

Your email address will not be published.