Minister Glenbert Croes a yega Hulanda pa bishita di trabao.

 

Den Haag  – Diadomingo 15 di mei Minister di Labor, Energia y Integracion Glenbert Croes a yega Hulanda. Minister Croes a keda ricibi na aeropuerto Schiphol pa Minister Plenipotenciario Suplente mr. Ady Thijsen.

 

Minister Croes ta na Hulanda pa un bishita di trabao. Entre otro e mandatario lo tin reunion cu Minister pa Asuntonan Social y di Labor Karien van Gennip, Minister pa Clima y Energia Rob Jetten, Secretario di Estado di Husticia y Seguridad Eric van der Burg y Secretario di Estado pa Asuntonan di Reino Alexandra van Huffelen. Tambe Minister Croes lo tin un reunion cu Staatsraad pa Aruba mr. Milly Schwengle.

 

Mientras tanto e reunion cu Sra. Schwengle ya a tuma luga durante cual e mandatario a entreg’e un copia di su maneho y a elabora riba e reunionnan cu e mandatario lo ta sosteniendo na Hulanda.

 

Dialuna tambe e reunion cu Secretario di Estado pa Asuntonan di Reino Sra. Alexandra van Huffelen a tuma luga. E mandatario a expresa su gratitud na Sra. Van Huffelen pa a ricibi su persona, agradecido pa e cooperacion y apoyo cu Aruba a haya di Gobierno di Reino na un momento asina crucial den historia. Manera e mandatario Arubiano a expresa: “Nos lo sigui cana e caminda hunto, coopera hunto brindando tur nos ciudadanonan un caminda pa un miho futuro semper”.

 

Proximamente riba agenda ta e reunion entre Minister Glenbert Croes y e Minister di Energia di Gobierno di Hulanda, Sr. Rob Jetten.

Share:

Leave a Reply

Your email address will not be published. Required fields are marked *