Dialuna madruga a drenta informe di cu a pega un bus na candela na Jucuri, mesora a dirigi tanto polis como bombero na e sitio. Na yegada di e patruya a bin compronde cu desconocidonan a drenta den e bus di C-Jam Bar Hopping y a basha gasolin den e bus y a laga e “jerry-can” cu yena cu gasolin aden y a pega e paden di e bus na candela y a core bay for di e sitio. E doño kende tabata drumi a tende e cachonan ta blaf y a mira candela den e bus. Mesora ela pasa man pa un slang cu un hemchi y a purba paga e candela.  Bombero tambe a presenta y a paga full e candela. Den e bus a haya e Jerry-can conteniendo gasolin. Polis a keda di bay busca imagennan di camaranan di seguridad den cercania pa asina haya e sospechosonan aki.