![](https://www.awe24.com/wp-content/uploads/2019/12/440a5d22-d972-4a8a-9949-4e40203e4911-668x334.jpg?v=1577441397)
Un trio a perde nan libertad debi cu nan a bay bende cosnan horta. Un famia trahando cas na Jaburibari a perde nan material di trabou. Basta Power Tool a disparce y ta basta placa na ekipo. Algun dia despues nan a mira cu nan cosnan horta a wordo poni riba rednan social pa bende. E famia a reconoce e Power Toolnan como nan propiedad cu a ser horta algun dia pasa. A cuminsa mesora busca manera di yega den contacto cu e ladronnan cu kier a bende. A ofrece cu kier cumpra tur cos for di nan. A notifica Polis tambe. A haci denuncia oficial na Polis. Asina a prepara e encuentro y Polis a duna e total coperacion mientras cu e doño di e cosnan horta a busca nan yudansa. A palabra un localidad unda mester topa e Tercel A-68049. E lugar tabata Bloemond Supermarket na Bloemond Paradera. E momento di encuentro Polis a presenta y haci e detencion. Segun por a compronde tabata tin tres persona y tur tres a keda deteni. Entrenan tin un dama cu parce a pone e cosnan riba rednan social pa bende. Uno kier a purba despista pa huy pero tambe a keda deteni. Parce cu el a haya un lift pa trabou aparentemente. Asina mes awor tur tres ta sospechoso. Nan mester bay splica mas riba e cosnan horta cu tabata den e Tercel blanco y cu ta propiedad di esnan trahando cas na Jaburibari. Aki por mira con e tremendo coperacion di Polis y insistencia di doñonan di e cosnan horta a yega na e ladronnan. Awor mester wak unda mas esnan deteni por a horta.
![](https://www.awe24.com/wp-content/uploads/2019/12/View-recent-photos-707x1024.png?v=1577443606)