Diadomingo 5 di januari 2020: THRILL WALKERS su PROME ACTIVIDAD GRANDI pa 2020 Eric Gomez 5.5K Walk & Run ta sali 5:30p.m. for di Sport Boys na Angochi

Saludos deportivo di parti Thrill Walkers pa e dushi temporada di fin di aña. Nos di directiva di Thrill Walkers kier a desea e pueblo di Aruba un aña yena cu salud, amor, alegria, positivismo y metanan deportivo.

Aña 2020 lo habri cu nos Eric Gomez fun walk and run. Esaki lo sali di Club Sportboys pa 5.30 di atardi.

Aña 2020 ta bay habri cu hopi reto pa nos atleta y deportistanan. Thrill Walkers S.V. den su afan pa sigui contribui na un Aruba den movecion y mas saludabel ta organisa su prome gran actividad pa aña 2020. E evento aki ta uno cu Team Thrill Walkers a bin ta organisa pa algun aña caba bou di e nomber di ‘United Fun Walk and Run’ y ta conta cu un participacion masha grandi mes di persona interesa y comprometi pa cuminsa move, ehercita y traha riba mehoracion di nan condicion y salud.

‘Eric Gomeztht 5.5K Walk & Run’ ta tuma lugar diadomingo  dia 5 di januari 2020 y ta sali exactamente pa 5:30 p.m. for di e veld dilanti di Club di Sport Boys na Angochi.

Ya  for di 4:00 p.m. por cuminsa registra participacion of cumpra ticket ainda pa por participa.

Ruta di United 5.5K Walk & Run:

Salida ta for di e veld dilanti di Club di Sport Boys na Angochi bin abou na e caminda-T Angochi 8C, ta bira na man robes bay direccion zuid. Aki ta yega otro caminda-T di Sombre 20B y ta bira na man drechi bin abou riba e caminda y ta sigui te na e cruzada di caminda di Kas Ariba 43, na altura di e dam di Kas Ariba. Despues ta bira na man drechi sigui direccion noord riba caminda di Ser’i Compa pa Kadushi Largo. Ta yega e cruzada di caminda di Kadushi Largo y ta bira na man drechi subi e caminda di Kadushi Largo sigui bay ariba full pasa den Angochi y yega na otro cruzada di Sabanilla Abao cu Angochi. Na Angochi 28 ta bira na man drechi un biaha mas y ta keda riba e caminda di Coba Lodo bin zuid te na e caminda-T di Coba Lodo 18 (Felis Ras). Despues ta bira na man drechi y bin abou riba e caminda di Sombre  te bolbe yega e caminda-T Sombre 20B, aki ta bira bek na man drechi y bin direccion noord pa finalisa mes caminda cu a cuminsa dilanti di Club di Sport Boys.

Riba ruta lo tin ‘waterpost’ pa asisti tur participante, como tambe na final ta ricibi awa, fruta y hopi premio interesante manera tur aña, danki na nos patrosinadornan. E aña aki tambe Thrill Walkers S.V. tin doorprize cash di 500, 250, 100, 100 y 50 florin.

Participacion ta solamente 5 florin pa persona, carchio ta obtenibel cerca nos miembronan como tambe na Ibisa. Sigur ta un bon momento pa cuminsa fiha metanan pa cumpli cu nan durante aña. Esaki ta Thrill Walkers S.V. su prome gran actividad pa aña 2020, cu un biaha mas ta bira otro aña grandi pa e organisacion cu tin como meta pa promove movecion: “Move pa Salud” . Durante aña tin plannan grandi pa sigui cumpli cu nan pa loke ta actividad di movecion.

Thrill Walkers ta hasi uzo di e oportunidad pa invita henter Pueblo di Aruba, su miembronan, deportista y atletanan pa bin participa grandemente diadomingo atardi na Angochi na e ‘Eric Gomez 5.5K Walk & Run’.

Na comienso di e aña 2020 Thrill Walkers S.V. ta desea tur miembro, deportista, atletanan y Aruba en general un aña productivo y positivo. Cu tur meta y deseo keda realisa pa hunto nos yega na un Aruba Salud pa un y tur.

Share:

Leave a Reply

Your email address will not be published.