Update di Encuesta di Mucha y Hoben 2022

 

Desde diabierna 14 di oktober 2022, Oficina Central di Estadistica (CBS) ta ehecutando un encuesta tocante mucha y hoben: Encuesta di Mucha y Hoben 2022. E proposito di e encuesta aki ta pa haya un mihor bista di diferente tema di importancia pa mucha y hoben, por ehempel: actividadnan di mucha y hoben den nan tempo liber (deporte, arte, trabou boluntario), participacion na scol, participacion riba mercado laboral, bista riba nan futuro, relacion cu mayor, uso di celular, medionan social, gaming y posibel problemanan relata na esakinan, humamento/vaping, uso di alcohol y droga y salud mental. E encuesta lo tin un duracion di 1 luna.

Pa un mucha of hoben cu ta menor di edad por participa, mester di e aprobacion di un mayor of voogd. Un total di 3.500 hogar lo wordo bishita door di encuestadornan di CBS. Encuestadornan por wordo indentifica na e badge cu nan nomber, potret, logo di e encuesta y e logo di CBS.

Tur informacion colecta durante e encuesta aki ta wordo procesa anonimamente y lo publica solamente estadisticanan den forma agrega. E informacion di tur mucha y hoben ta contribui na mehora e disponibilidad di informacion pa por tin un mihor bista riba e desaroyonan cu ta tuma lugar cerca mucha y hoben na Aruba. Pa e motibo aki e contribucion di cada mucha y hoben ta esencial!

 

UPDATE

Pa medio di e relato aki CBS kier a informa cu pa e di cinco siman di e Encuesta di Mucha y Hoben 2022 ya caba a colecta dato di 1918 hogar y 3270 mucha y hoben.

CBS ta gradici tur mucha, hoben y mayor/voogd cu ya caba a participa na e Encuesta di Mucha y Hoben 2022 y ta pidi cooperacion di tur esnan cu lo wordo acerca door di nos encuestadornan den e dianan venidero. Pa mas informacion, por tuma contacto libremente cu e team di CBS di dialuna pa diabierna durante ora di oficina (7:30 am – 4:30 pm), na number di telefon: 524 7433 of por manda un e-mail na cbs@setarnet.aw

 

 

Share:

Leave a Reply

Your email address will not be published.