Willemstad, 20 di Desèmber 2022 – TUI a introdusí e liña di produkto Fair Travel na luna di mart di aña 2021. Esaki ta enfoká riba biahamentu ku mira riba e komunidat lokal i ekonomia, estadia den hotèlnan ku un etikèt ekológiko i invertí den sistemanan di mobilisashon mas sostenibel. Kada pasahero ku kumpra un biahe di Fair Travel, ta kontribuí ku 2 euro i TUI ta añadí 2 euro. A logra rekoudá un montante grandi ku e fondo aki e aña último na Hulanda i Bèlgika. TUI lo invertí un parti supstansial di e entrada aki den instalashon di portalnan di karga outonan eléktriko na Kòrsou, Aruba i Boneiru.
TUI ke stimulá biahamentu mas sostenibel. Esaki ta wòrdu hasí riba un eskala grandi a base di e strategia di e kompania di biahe mundial TUI Group i tambe ku inisiativanan konkreto na destinashonnan di vakashon. Kòrsou ta un destinashon sumamente importante pa TUI, e organisashon di biahe ta transportá hopi pasahero. TUI ta deseá pa turismo keda di balor agregá pa e islanan i e komunidat lokal. No solamente pa lokual ta trata e aspekto ekonómiko pa komersiantenan lokal i komo e sektor ku ta perkurá pa kuponan di trabou, sino tambe pa mantené esaki atraktivo pa un i tur den futuro. Pa e motibu ta importante pa hasi biahenan mas sostenibel. Na Hulanda esaki ta un tópiko diario di kòmbersashon, pero na e islanan bunitanan aki esaki ta un tópiko ku ainda ta hala poko ménos atenshon. Pero, invertí den sostenibilidat ya kaba ta un nesesidat. Outonan eléktriko ta kontribuí na minimalisá ekspulshon di stòfnan dañino. Na e momentonan aki tin relativamente poko outo eléktriko na Antia. Un di e kousantenan pa esaki ta ku no tin masha portal pa karga outo kasi niun kaminda.
Pa e motibu ei TUI Hulanda i Bèlgika ta invertí den portalnan di karga outo eléktriko na e destinashonnan bunita aki. Den kolaborashon ku e kompania lokal Dynaf, lo instalá no ménos ku 55 portal di karga outo eléktriko den e promé parti di e aña próksimo, 30 na Kòrsou, 15 na Aruba i 10 na Boneiru. Nan lo ta lokalisá na diferente sitio, tantu na hotèl, komo na lokalidatnan usual manera supermarket. Tambe lo instalá algun portal di karga outo eléktriko, e asina yamá ‘solar carport’ na sitionan ku no ta asina komún ku tin koriente, por ehèmpel na lamannan ku ta leu situá.
Arjan Kers, Gerente General di TUI Hulanda: “Pa e turismo di futuro ta importante pa kuminsá invertí den inisiativanan ku ta sostené sostenibilidat for di awor. Ya kaba tin proyektonan ta kanando ku TUI CARE Foundation, proyektonan manera prosesamentu di residuo di plèstik huntu ku Green Phenix. Pero ku e invershon importante aki di instalashon di portalnan di karga outonan eléktriko, nos ke kontribuí direktamente na un transporte mas bèrdè. Nos a dal e promé stap, awor ta toka turno na hürdónan i bendedónan di outo pa perkurá pa amplia e flota di outonan eléktriko.”
Awe e proyekto a wòrdu lansá ofisialmente den kompania di Minister di Tráfiko, Transporte i Planifikashon Urbano, Charles Cooper i Minister di Desaroyo Ekonómiko, Ruisandro Cijntje. Arjan Kers, Gerente General di TUI Hulanda, a desmantelá e promé portal di karga outo eléktriko i den forma simbóliko a konektá un outo eléktriko na e portal.
Tokante di Dynaf Group:
Dynaf Group ku kantornan situá na Kòrsou, Aruba i Sint-Maarten ta enfoká ya pa 23 aña pa brinda solushonnan di energia den e region di Caribe ku mantenshon pa bida largu i servisio 24/7. Na 2019 Dynaf Group a inisiá ku sistemanan di karga di D-Point i di e forma ei e promé portal di karga a wòrdu instalá na Kòrsou. Dynaf ke ta parti di e evolushon kontinuo di portalnan di karga den region di Caribe i ke mehorá e infrastruktura pa vehíkulonan eléktriko. Na e momentonan aki e ret di D-Point tin 70 instalashon aktivo ku mas di 28.000 transakshon di karga prosesá for di kua a suministrá 240.000 KWh repartí den e 3 inslanan.
|
