Dia Mundial di Telecomunicacion y Sociedad di Informacion, 17 di mei 2020

Tema: “Conecta 2030: ICT pa e Obhetivonan di Desaroyo Sostenibel”

ORANJESTAD- Riba 17 di mei na aña 1969 a cuminsa celebra tur aña Dia Mundial di Telecomunicacion. E dia aki ta coresponde cu e fecha di 17 di mei 1865 riba cual a funda Union Internacional di Telecomunicacion (ITU) y a firma e prome convenio Internacional di Telegraf na Paris.

Na november di 2005, durante e Cumbre Mundial tocante e Sociedad di Informacion, a haci un yamada na e Asamblea General di Nacionnan Uni pa declara dia 17 di mei tambe como Dia Mundial di e Sociedad di Informacion, p’asina pone atencion riba e importancia di tecnologia ICT y e scala amplio di aspectonan tocante e Sociedad di Informacion, cu a bin pa dilanti durante e cumbre.

Na november 2006 a dicidi pa den futuro celebra 17 di mei como “Dia Mundial di Telecomunicacion y Sociedad di Informacion”. E proposito di e dia aki ta pa yuda crea consciensia di e posibilidadnan di uzo di Internet y otro tecnologia di ICT pa sociedad- y economianan y tambe forma pa reduci e division digital cu ta existi na mundo.

ITU ta un organo specialisa di Nacionnan Uni pa tecnologia di informacion y comunicacion (ICT). Funda pa facilita conectividad internacional di rednan di comunicacion, ITU ta aloca spectro radioelectrico pa henter mundo y orbita di satelite, ta traha norma tecnico pa segura cu rednan y tecnologia por interconecta cu otro sin problema, y ta haci esfuerso pa mehora acceso na ICT pa comunidadnan cu ta insuficientemente atendi. Cada biaha cu haci un yamada telefonico via mobil, subi Internet of manda un email, nos ta benificia di e trabounan di ITU.

E tema pa e dia aki ta duna oportunidad pa conmemora e contribucion di ICT na e desaroyo di e Sociedad di Informacion en relacion cu e “Programa Conecta 2030 pa e desaroyo mundial di telecomunicacion/ICT”, cu awo ta vincula cu Plan Strategico di ITU pa e periodo 2020-2023, y cu ta specialmente dirigi riba e pregunta con avance tecnologico por contribui pa acelera realisacion di e Obhetivonan pa Desaroyo Sostenibel den e dies añanan venidero.

Tecnologia di informacion por ta un luz di esperansa cu ta permiti cu miles di miyon di persona ta conecta cu otro riba mundo henter. Durante e pandemia di COVID-19 e conexionnan aki – cu sernan stima, cu scol y universidad, cu lugar di trabou, cu profesionalnan di salud y cu suministracion esencial – ta mas importante cu nunca.

Ministerio di Transporte, Comunicacion y Sector Primario ta manda un pabien na tur instancia y compania cu directamente of indirectamente ta envolvi cu telecomunicacion y ICT.

Share:

Leave a Reply

Your email address will not be published.