Oranjestad, 9 mei 2023 – E proyecto piloto a resulta exitoso y awor ta wordo converti den un servicio oficial di ELMAR pa KPA. Por medio di Ministerio di Husticia y Asuntonan Social, ELMAR y Cuerpo Policial Aruba (KPA) a alcansa un acuerdo di servicio di camara di siguridad, cual lo wordo instala riba e Smart Grid di ELMAR. Esaki ta facilita KPA pa supervisa y mantene orden publico. A cera un acuerdo di servicio pa huur y mantenemento di e camara. E camara lo wordo maneha completamente pa KPA, mientras cu ELMAR ta brinda apoyo tecnico.

E Smart Grid di ELMAR ta un infrastructura dinamico cu ta wordo utiliza pa innovacion y creacion di productonan y servicionan nobo di ELMAR. E Smart Grid ta permiti conexion cu e camara di siguridad, loke ta permiti KPA pa monitoria e situacion di siguridad den tempo real. Den combinacion cu otro proyecto di Smart Grid manera sistemanan di luz di caya ‘smart’ y medidanan di conservacion di energia, e servicio di camara di siguridad publico lo yuda nos alcansa nos meta pa sigui desaroya nos Smart Grid caminda cu ta provee nos habitantenan un ambiente sano y sigur. E Smart Grid ta un fundeshi importante pa e desaroyo di tecnologia y innovacion cu ta beneficia nos comunidad.

ELMAR ta enfoca riba su responsabilidad social (CSR Corporate Social Responsibility) como compania nacional, y ta comprometi pa trece mas siguridad na Aruba. E proyecto di camara di siguridad ta un parti vital di e compromiso di ELMAR pa provee un ambiente sigur pa tur esnan cu ta biba y bishita nos pais. Como un compania local, ELMAR ta comparti e responsabilidad di utiliza su infrastructura di grid pa beneficio di e comunidad, y e instalacion di e camara di siguridad ta un testimonio di esaki, conhuntamente cu ELMAR su maneho di luznan di caya.

ELMAR ta contento di por brinda e servicio nobo di camara di siguridad pa KPA, y nos ta keda comprometi pa continua traha duro pa innova y mehora e bida di nos habitantenan di Aruba.