Diamars anochi a drenta informe di un accidente cu un motociclista seriamente herida pariba di e brug riba e Green Corridor, mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un motociclista cu tabata bayendo pabao cu velocidad basta halto anto prome cu ela yega e brug ela perde control y a bay dal riba e beton un banda di e caminda y a keda lastra un distancia basta largo riba e caminda. E victima a resulta seriamente herida y na yegada di e ambulans mesora a atende e victima y a transporte cu urgencia pa hospital. Polis a sera e caminda pa asina por a investiga e accidente. Riba caminda di unda e brommer a dal y a keda lastra abao tabata tin varios parti di e brommer cu a keda gespart.