Diabierna anochi a drenta informe di un accidente cu hende herida dilanti Cadushi Supermarket na Tanki Lendert, mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un accidente entre 3 auto y 3 hende herida. E chauffeur di e Nissan Tiida bayendo nort a bay mucho na su man robes y a bay dal semi frontal cu e auto KIA Picanto di direcion contrario. E impacto aki a manda e KIA Picanto pafor di caminda mientras e Nissan Tiida a bira den banda unda un Suzuki SX4 cu tambe tabata bayendo nort a dal e Tiida den banda di chauffeur. Den e impacto aki tur 3 chauffeur a resulta herida. E chauffeur di e Kia Picanto a resulta seriamente herida como tambe e chauffeur di e Nissan Tiida, mientras e chauffeur di Suzuki SX4 a djies haya un corta chikito na su man. Na yegada di e ambulans nan a atende e promer dos chauffeurnan y a transporta nan pa hospital. E otro chauffeur a ser atendi na e sitio mes.