ORANJESTAD: Dos siman di deporte escolar ta culmina diabierna 9 di juni, cuminsando 5:30 di atardi na Joe Laveist Sport Park na San Nicolas.  E atardi ta inicia cu e gran final di futbol di scol preparatorio. Un total 45 scol y alrededor di 1000 alumno di scol preparatorio, basico y secundario di Aruba a enfrenta otro den un competencia amistoso den shete (7) diferente disciplina, entre otro, badminton, functional fitness, volleyball, basketball, futbol, beach tennis y baile deportivo.

Depues di e final di futbol ta continua cu show di baile di e grupo NTG & NLG bou guia di Marisol Peña, entregamento di premio na e scolnan ganado y e hungado di mas valioso (MVP) Entretenimento ta den man di dj Spike y Groove Masters. Durante ceremonia di clausura lo tin diferente premio atractivo di, entre otro, The Healthy Way Aruba.

Diasabra, dia 10 di juni ta tuma luga e Competencia di Baile Deportivo y Cultural na Aruba Entertainment Center na Dakota, cuminsando 5:00 di atardi cu show di baile cultural, dies (10) scol ta competiendo den baile cultural y moderno, tambe lo tin diferente tent di cuminda crioyo y artesania. Tin presentacion di baile di Club di Movimiento, Scol di Baile Diana Antonette y NTG & NLG Dancers. Ritmo Real hunto cu Freddy “Rasta” Richardson y Issabeach ta cera Weganan Escolar 2023.