Diahuebs 8 di juni 2023, Gobernador di Aruba Alfonso Boekhoudt a ricibi e tercer (3) edicion di
e ‘BUKI DI PRET ARUBA’ na e scol basico Colegio Laura Wernet-Paskel. Gobernador Boekhoudt ta
haya cu ta importante cu ta existi iniciativanan manera Buki di Pret y pesey el a acepta e buki cu hopi entusiasmo. Haciendo esaki, gobernador a expresa su mes bisando: “E ta un buki hopi bunita, yen di actividad. Mi tambe lo tin un bunita actividad di cana den nos naturaleza y e ta poni den e buki. Ta necesario si pa reserva trempan, paso no ta henter mundo mi por hiba cumi. Mi ta invita tur hende pa comparti hunto cumi, e amor pa naturalesa”.
E CANTIDAD DI ACTIVIDADNAN A WORDO REDOBLA COMPARA CU E EDICION 2022
Buki di Pret ta un buki gratis, yen di actividadnan y ofertanan divertido, sorprendente y educativo,
valido durante di vakantie grandi, specialmente pa e muchanan di scolnan basico di Aruba. E aña aki, tin 80 actividadnan y diferente ofertanan pa escoge. Mayoria di e actividadnan ta wordo ofreci
diferente biaha durante vakantie grandi. Pa loke ta e actividadnan, e kalender di actividad ta indica cu tin un total di mas cu 200 actividadnan divertido. Esaki ta significa cu e actividadnan a wordo redobla compara cu aña pasa.
HACI ACTIVIDADNAN POSIBEL Y DESCUBRI TALENTONAN
E meta tras di e fundacion non-profit, ta pa brinda na muchanan entre 6 y 13 aña, cu ta biba na
Aruba, un vakanti grandi divertido y estupendo. E buki ta ofrece un variedad grandi di actividadnan: for di actividadnan deportivo y relaha te cu actividadnan creativo y educativo. Tambe tin actividadnan cu animales y ofertanan di cumindanan dushi y tambe soft.
E iniciadonan ta spera cu e buki lo anima muchanan y nan mayornan pa descubri hopi actividadnan
divertido cu Aruba ta ofrece y stimula mucha pa descubri nan interesnan y talentonan. Danki na e
buki aki, yena cu actividadnan y ofertanan accesibel, cu tin biaha hasta ta gratis, esaki ta posibel pa
tur mucha, independientemente di nan situacion economico! For di dia 8 te cu día 16 di juni 2023, e
ekipo di voluntario lo bishita e scolnan basico pa entrega e “Buki di Pret”, na casi 9.000 mucha di e
klasnan 1 te cu 6 (di 6 pa 13 aña).
SOSTENI PA E ORGANIZACIONNAN Y ASOCIACIONNAN LOCAL
A haci pregunta na negoshantenan, organisacionnan, fundacionnan y asociacionnan di Aruba si nan
kier a participa y inventa y organisa actividadnan atractivo y accesibel pa tur mucha. Banda di e
organisacionan activo, Buki di Pret tambe ta ricibi e apoyo di diferente patrocinadonan.
Fundacion Buki di Pret ta gradici un y tur cu a yuda pa realisa e “Buki di Pret”.
