Diasabra madruga a drenta informe di cu 3 persona a yega den un auto na un cas y ta menasando e habitante, mesora a dirigi patruyanan na e sitio. Na  caminda pa e adres net polis a topa e auto cu a caba di bandona e sitio, polis mesora a bay nan tras den un persecucion den Dakota. Na un dado momento durante e persecucion e sospechosonan a baha for di e auto y a laga esaki sigui core te bay dal riba un mata banda di Banco di Caribe, mientras e sospechosonan a core bay na pia drenta mondi. Polisnan mesora a inicia un buskeda den e mondi y a topa cu un pareha cual tabata cuadra cu e descripcion duna y a detene nan. Bayendo bek pa e auto a topa e di 3 sospechoso y e tambe a keda deteni. Polis a confisca e auto pa mas investigacion. Segun e victima durante e menasa ela mira un arma di candela pero polis no a logra haya esaki. Segun por a compronde e caso di menasa lo tin di haber cu un problema cu a surgi na un club nocturno no mucho leu di unda a haya nan.