ORANJESTAD: Diahuebs anochi, na Compleho DeportivoYara na Savaneta a tuma luga apertura di e di dos edicion di Copa Roy Croes organisa na S.V. Unistars. E torneo ta dedica na fundado, presidente, coach y tata di e presidente actual di S.V. Unistars Sr. Roy Croes den feliz memoria. Sr. Roy Croes tabata un persona hopi conoci den e bario di Pos Chikito y Savaneta. Trinticinco aña pasa, el a funda S.V. Unistars pa asina tene e muchanan di bario for di caya. Sr. Roy su lema tabata: ”un futbolista mas ta un delincuente menos”.

Minister Endy Croes a presencia apertura di e torneo Copa Roy Croes 2023. Na e ocasion aki mandatario di Deporte a hiba palabra y a efectua sac’e di bala. E torneo ta continua durante fin di siman aki na Compleho Deportivo Yara, unda cu 16 ekipo ta participa: Seleccion di Aruba Damas, La Fama, Rcs, Brazil jrs, River Plate, San Luis, Estrella, Jong Aruba, Real Koyari, Sporting, Caravel, RCA, Dakota, Sportboys, Bubali, Britannia y Unistars.

E prome encuentro tabata entre Unistars Veterano y Unistars Presente. E veteranonan di Unistars a gana e wega cu e score di 3-2 cu golnan anota door di Minister Ursell Arends, Sr. Levy Geerman y Sr. Shawn Wever. Di otro banda, e golnan a wordo anota door di Sr. Omar Guerrero y Sr. Miguel Ortiz.

Pa conclui, Minister Endy Croes ta gradici pa e invitacion y ta felicita S.V. Unistars pa organisa un tremendo torneo di futbol. Alabes, Minister Endy Croes ta desea tur ekipo hopi exito den e torneo Copa Roy Croes 2023.