ORANJESTAD: E aña aki ta di cinco aña consecutivo cu Gobierno di Aruba ta organisa un concurso caminda cu a traves di nan pintura muchanan ta expresa y siña tocante Aruba Ley di Cacho. E concurso aki a wordo carga e prome tres (3) añanan door di nos Minister-President Evelyn Wever-Croes tambe door di colega Minister di Husticia y Asunto Social Rocco Tjon. E aña aki e ta wordo carga door di Minister di Enseñansa Endy Croes cu a dicidi di sigui e liña di e campaña cu Cuerpo Policial a inicia: Cacho den Cura, ta Ley e Ta. Pa es motibo, e titulo di e Concurso di Pintamento 2023 ta: Cacho den Cura.
E meta di e Concurso di Pintamento 2023 ta pa sigui conscientisa comunidad, specialmente e muchanan, tocante e cuido debido di nan mascota y e muchanan na nan turno tambe lo por educa nan mayornan ora nan mira algo cu no ta cuadra. Si tur ciudadano di Aruba cuminsa inculca e atencion debido di nos leynan den nos muchanan, den e caso aki, e Ley di Cacho, nos lo por garantisa un miho futuro pa locual ta trata doñonan di mascota responsabel cu ta respeta e ley y alabes nan propio cachonan.
Participacion ta gratis y ta habri pa tur mucha di scol basico (aña 1 te cu aña 6). Minister di Enseñansa su deseo ta pa e mes of su colega Minister di Naturalesa Ursell Arends bini cu un concurso pa scol primario (kleuter) rond di e luna di october. E aña aki probablemente ta e ultimo biaha cu Gobierno di Aruba ta organisa e concurso pa scol basico di e manera aki, mirando cu ambos Minister Endy Croes y Minister Ursell Arends a caba di percura pa material di educacion tocante e tema, pa por drenta scol primario y scol basico pronto y pintamento similar lo forma parti di e material di educacion aki. Gobierno di Aruba ta hopi contento cu e participacion durante e ultimo añanan. Cu cooperacion di varios maestro y maestra, a registra mas di 400 pintura na aña 2019, na aña 2020 mas di 500 pintura, na aña 2021 mas di 1000 pintura y na aña 2022 mas di 1200 pintura! “Ohala nos por conta cu un cantidad record e aña aki”, Minister Endy a expresa.
Pa e Concurso di Pintamento 2023, a diseña un formulario di participacion di dos (2) pagina. Pagina uno di e formulario ta e pagina di instruccion y ta contene e informacion necesario pa por participa y pagina dos ta caminda e muchanan tin di pinta un of mas cacho den cura segun nan propio imaginacion y demostra nan creatividad cu nan arte. E pintura mester ta original y por ilustra mas di e puntonan di nos Ley di Cacho. Ambos pagina mester wordo pinta door di e mucha mes, na color y sin ayudo di un mayor.
Dia 26 di augustus 2023 ta dia internacional di cacho y semper a purba lansa e concurso riba e fecha aki. Mirando cu e aña aki e fecha ta riba diasabra, a dicidi di hala e fecha cu un (1) dia. “Nos deseo ta pa tur scol participa y pa henter e comunidad di Aruba stimula tur alumno di scol basico pa participa cu nan talento na e Concurso di Pintamento 2023. Asina un bes mas, e concurso aki por ta uno exitoso.”, Minister Endy a señala. Si no a ricibi e formulario di participacion ainda, lo por download e formulario via www.specialprojectsaruba.org tambe pa print pagina 2 (e print mag ta blanco cu preto).
E fecha final cu e muchanan por entrega nan formulario di participacion ta diabierna dia 22 di september 2023. Tene cuenta cu e alumno mester entrega e pagina di tarea (pagina 2) cu tur informacion completo pa por participa. Por entrega e formularionan di participacion na Bestuurskantoor Oranjestad, na HBK San Nicolas of na e MFA mas cerca di scol.
Lo tin un regalito pa e ganadonan di cada klas. E ganadonan lo wordo anuncia dia 4 di october 2023, Dia di Bestia, riba e pagina di Facebook di Gabinete Wever-Croes y e muchanan lo wordo invita den e luna di october despues di vakantie pa ricibi nan regalito.
