No cu mucho asombro, Partido MEP un biaha mas ta tuma nota di reaccionnan falso di e ex prome minister di Aruba, Mike Eman. Un personahe riba nos pais cu ta biba lubida su maneho financiero desastroso uzando placa di companianan estatal pa cosnan cu nunca tawata tin prioridad pa nos pais, gastando miyones na conferencianan sin vision y sin ningun resultado y ademas pa gasta miyones na e prensa liga na su partido.

 

Mike Eman, cu un paar di hende para su tras, recientemente a haci comentarionan cu Gobierno ta ranca 15 miyon di ELMAR y WEB. Mike Eman no mester lubida cu e si a ranca placa na gran cantidad for di nos companianan estatal pa fechoria partidista politico. Ademas, Mike Eman ta bisa cu nos Gobierno ta bin cu yen di medida. MEP ta un partido cu ta goberna responsabel cu mester atende y paga e debe cu Mike Eman a crea, un debe cu a causa un problema financiero hopi grandi pa nos pais. Y esaki den tempo di bonanza, sin pandemia y niun otro crisis mundial.

 

Partido MEP ta recorda Mike Eman cu tempo cu el a goberna, e y su partido AVP, a saca miyones y miyones di dividendo di tur e companianan estatal cu den e tempo ey a haya e nomber di super dividend. Esaki tawata e prome y unico biaha den historia di nos pais cu algo asina ta sosode y Partido MEP ta spera cu Mike Eman y su partido nunca mas bin den gobernacion pa esaki nunca mas ripiti.

 

Super dividend pa semper lo keda den historia politico di nos pais hibando e nomber di Mike Eman. Pa loke ta e dividend di WEB y Elmar ta ainda mas cruel. Pasobra ademas di a hera manda nos compania estatal bancarota, ta di aki e Partido di Mike Eman tawata saca miyones di dividend pa nan biaha rond mundo hibando nan periodistanan comprometi na nan partido. Nan a gasta tambe mucho mas placa na Green Coridor cu e trabou lo a costa normalmente, privilegiando nan mes saco y di nan amigonan. Cu e placa di dividend di WEB y Elmar, Partido AVP na 2010 a busca Al Gore pa participa na nan conferencia berde, pagando e 350 mil dollar y hasta charter avion priva p’e cu placa di dividend di nos companianan Estatal. Kico a sali di e speech di Al Gore? Nada! Solamente e potret di Mike Eman cu Al Gore.

 

Nan a organisa cantidad di conferencia green, sin logra nada nunca, uzando placa di dividend di nos companianan estatal. Mike Eman su unico vision green tawata su color politico y con el a ranca placa di nos pueblo pa su vision fracasa. Un vision cu a costa nos pueblo miyones. E unico meta cu Mike Eman tawata tin cu su vision di energia tawata pa uza companianan estatal pa crea su imagen internacional y manda nan bancarota. Y esaki ta un hecho cu ta prohibi pa lubida.

 

Europe meets America, a gasta hopi placa di pueblo na biahenan pa sigui traha riba e imagen di Mike Eman internacionalmente unda hasta e FRIEND di Mike Eman , KIKO GOMEZ tawata invita pa “wine and dine”.

 

Dado momento, e companianan no por a wanta tur e gastonan aki mas y mester a hisa e tarifanan, esaki sin un guera, sin un pandemia mundial sino solamente pa deroche di placa di pueblo na un individual FRIENDS & FAMILY di AVP, Mike Eman.

 

Pero, tur e maneho ey tawata den tempo di Gabinete di Mike Eman. Awo, den Gabinete Wever-Croes I y II, e dividend ta bay pa cubri gasto di por ehempel onderstand, siguridad di Aruba y enseñansa entre otro. Esaki ta un gran diferencia entre e dos gobiernonan. Gabinete Wever-Croes ta traha pa nos pueblo, pa su bienestar. Mike Eman a traha pa su mesun saco y pa bienestar di su friends, family y prensa cumpra dunando ni un prioridad na futuro financiero di nos pais.