ORANJESTAD: Trabounan ta continua y dialuna ultimo, Minister Endy Croes a reuni cu Sra. Morela Dirks di ekipo di maneho di DPS, Sra. Edith Figaroa “staffunctionaris P&O” di DPS y Sra. Miguelina Flores consehero di recurso humano di Ministerio di Enseñansa y Deporte. Minister Endy Croes a duna un splicacion amplio di DPS den su totalidad, unda DPS ta awo y unda DPS tin cu bay.  Staf di DPS a ricibi presentacion di e vision di Minister Endy Croes y Gabinete Wever – Croes II. Manera ta conoci, DPS tambe ta bin na remarke pa recomendacion 9 di e Doorlichtingsrapport, pa esaki a dialoga di tur e desaroyonan positivo cu ya a tuma luga den DPS y kico lo tuma luga den e proximo seis (6) lunanan nos dilanti. Pa asina por cuminsa cana e caminda unda cu kier yega pa cu DPS su structura interno, trabounan cu mester haal in manera, “tijdelijke dienst” y “bezetting” di DPS den su totalidad. Banda di esaki, Minister Endy Croes a duna un splicacion amplio na e team di DPS di kico tur ta wordo haci pa enseñansa den su totalidad. Tin un total di 13 recomendacion den e Doorlichtingsrapport. Dia 2 di october ultimo, a bay di acuerdo cu Tijdelijke Werkorganisatie (TWO) di Hulanda riba recomendacion un (1) y tres (3) cu lo drenta pronto e fase pa e wordo ehecuta. Tambe, Minister Endy Croes a subraya cu tin un Aruba Matrix di diesshete (17) recomendacion di cual diestres (13) di e recomendacionnan ta forma parti di e Doorlichtingsrapport. Mandatario di Enseñansa a duna un splicacion amplio di tur loke ta tumando luga den enseñansa di Aruba den su totalidad, di cual DPS ta forma parti di e trayecto di enseñansa. Ta di vital importancia pa DPS ta alinea cu e pensamento-, vision-, recomendacion- y cambionan cu mester bin cu ta sumamente necesario pa e mehoracion di enseñansa. Pa conclui, Minister Endy Croes a indica di por mira bek riba un tremendo reunion, unda cu a comparti hopi informacion cu staf di DPS y ta sinti cu nan a aprecia esaki. Mandatario di Deporte a pidi cooperacion di esnan na timon di DPS actualmente pa e proximo lunanan aki pone tur  energia positivo, mantene e trabou di ekipo den DPS pa hunto traspasa y crusa e retonan grandi cu tin nos dilanti pa un miho porvenir pa enseñansa.