Habriendo porta pa nos studiantenan di Aruba.

 

ORANJESTAD: Diahuebs atardi, Minister Endy Croes hunto cu representantenan di Universidad di Aruba a reuni cu Sra. Darla Domke – Domante, Associate Provost for Global Initiatives y Professor of Management di Coastal Carolina University. Minister Endy Croes a expresa di a keda sumamente impresiona cu e conocemento y e historia di Status Aparte cu Sra. Domke – Domante sa di nos pais.Actualmente, tin shete (7) studiante di Aruba ta studiando na Coastal University. Minister Endy Croes a indica cu ta trahando riba e cooperacion entre Universidad di Aruba y Coastal Carolina University. Otro aña den luna di april of mei Minister Endy Croes lo haci un bishita oficial pa asina concretisa cierto palabracion. Sra. Darla Domke – Domante ta trahando pa 25 aña na Coastal Carolina University di cual e tin 12 aña trahando den colaboracion estrecho cu, entre otro, studiante y nan famia na Aruba. Sra. Domke – Domante a indica cu e ta impresiona di e pasion, energia y entusiasmo cu e studiantenan di Aruba ta trece na nan experencia academico. Tin asina hopi posibilidad y similaridad entre Coastal Carolina University, Universidad di Aruba y entre ambos comunidad. Tin asina hopi posibilidad unda cu por traha hunto den e area di, entre otro, sostenibilidad, educacion, investigacion y turismo. Nos a beneficia di e combersacionnan y awo nos por continua cu accion conrecto. Lo selecta e areanan specifico cu por beneficia ambos. Pa finalisa, Minister Endy Croes a expresa cu e tabata un bon reunion unda a comparti hopi informacion. E simia planta awe lo cosecha su fruta mañan. “Nos ta sigui traha cu amor y pasion pa crea oportunidad di estudio pa nos studiantenan local y pa Pais Aruba, habriendo porta pa nos studiantenan di Aruba”, Minister Endy Croes a indica.