Tur preparacion ta andando pa dia 14 october 2023, Aruba enfrenta Virgin Islands na cas.

 

ORANJESTAD: Recientemente, Minister di Enseñansa y Deporte Endy Croes a reuni cu e team di Ministerio di Deporte, kendenan ta Sr. Juni Faro, Sr. Rodymar Geerman y Sr. Kenneth Vrolijk. Den e ocasion aki a papia tocante renobacion di Compleho Deportivo Guillermo Prospero Trinidad. E motibo di e reunion aki ta pa e compromiso cu a haci cu Arubaanse Voetbal Bond (AVB), FIFA y CONCACAF pa haci un wega clasificatorio, dia 14 di october 2023 na Aruba. Desde aña 2016 e stadionnan na Aruba ta desaproba pa FIFA. Pa e motibo aki a pone vision, energia y parti financiero pa renoba e stadion na Dakota y haya un certificacion tanto di FIFA como di World Athletics pa e “track and field”. Acerca di e wega clasificatorio na Aruba dia 14 di october, a haci un compromiso cu CONCACAF y FIFA cu si e yerba artificial wordo poni y certifica prome cu 14 di october, lo haci un excepcion temporario pa Aruba, en bista cu pa shete (7) aña caba Seleccion di Aruba no por a hunga su “home games” aki y mester a hunga e weganan clasificatorio na Florida of Curaçao. Den e caso aki, a confirma cu CONCACAF Nations League lo tuma luga den Compleho Deportivo Guillermo Prospero Trinidad cu e tribuna band’i pabou cera y si den caso cu instalacion di luz no ta cla, ta permiti pa e tuma luga parti atardi. Durante e reunion a traha un lista largo di compromiso, a reparti e responsabilidadnan entre AVB, FFD, Fundacion Lotto pa Deporte y Ministerio di Deporte pa hunto logra e meta. Cada persona a haya un tarea y a cumpli cu nan responsalidad. Cada tres dia a reuni pa evalua e lista y analisa kico tur a cumpli pa dia 14 october proximo Seleccion di Aruba enfrenta Virgin Islands den un wega clasificatorio na cas.