Cu hopi placer Oficina di Turismo ta pone enfasis riba nos hobennan den luna di November. Esaki pa medio di “Voices of Tourism”, un campaña inspirativo cu ta diseña pa cultiva interes, compromiso y  pasion cerca studiantenan den e ramo di hospitalidad; esnan cu pronto lo uni nan mes na e sector di turismo. E campaña ta enfoca riba studiantenan di E.P.B., E.P.I y Universidad di Aruba, kendenan ta representa e gran parti di forsa laboral y e futuro lidernan di e industria di turismo na aruba.

E campaña ta dirigi na studiantenan cu a scoge pa studia den e sector di hospitalidad. Algun hoben ta labora caba den e industria. A.T.A ta pensa cu ta di sumo importancia pa sigura cu  e studiantenan ta keda motiva pa berdaderamente uni nan mes y sigui wordo ekipa cu conocemento y cu aspectonan cu ta contribui na tin e “mindset” rekeri pa labora den e industria di turismo -of otro industria. Banda di e estudio cu nan ta sigui, a base anual A.T.A. ta dedica un momento special na nos studiantenan, pa medio di presentacionnan cu ta conta cu diferente orador entre otro. E aña aki nos ta dedica atencion na luna di November pa medio di “Voices of Tourism”.

E campaña lo conta cu dos diferente iniciativa. Cada uno tin como obhetivo pa involucra, educa y inspira studiantenan. Entre otro, lo lansa un series di video y entrevistanan cu ex-studiantenan cu a studia hospitalidad na Aruba y cu awo ta profesionalnan den e area di hospitalidad. Den e videonan, e profesionalnan ta conta di nan trayectoria, experticio y ta comparti consehonan valioso. E campaña lo conclui cu un evento special cu presencia di A.T.A. acompania pa un orador internacional, kende lo motiva studiantenan pa reflexiona riba nan proposito, crecemento, con pa acepta desafio y siña for di diferente situacion pa por yega na libera e potencial completo den nan mes.

 

Un danki special na ex-studiante Reuella Reeberg – Director of Human Resources Operations Marriott Aruba, Eliana Fun – Director of Sales – Embassy Suites by Hilton, y Minerva Flemming FBO Manager – JET-TNCA cu participacion den e campaña “Voices of Tourism”.

 

Cu esaki, A.T.A. ta spera di sigui contribui na creacion di un grupo di profesionalnan cualifica y respeta cu no solamente ta sobresali den nan trabounan, pero tambe lo crea cambionan positivo door di cultiva crecemento sostenibel, preservacion di cultura, y un sentimento fuerte di responsabilidad pa comundidad y medio ambiente. E iniciativa aki ta complementa otro iniciativanan di A.T.A. unda e ta enfoca riba nos hobennan, incluso studiantenan. Aki por pensa riba colaboracion cu Universidad di Aruba, pero tambe entre otro cu diferente scolnan basico unda cu docentenan tin entre otro material di turismo y ta educa nos muchanan riba e materia aki.

A.T.A. ta extende un invitacion cordial na tur studiante pa participa na e campaña di Voices of Tourism. Sigui pagina social Oficina di Turismo pa por mira e videonan cu lo ser lansa durante luna di November. Hunto nos por crea un futuro mas briyante pa Aruba su industria di turismo.