Aruba, 1 di November, 2023 – For di Januari te cu September 2023, e esfuersonan dedica di Stimami Sterilisami a resulta den e sterilisacion exitoso di mas cu 3,475 cacho y pushi e aña aki te awor. E logro aki ta contribui na un total impresionante di 34,638 sterilisacion desde cu e campaña a cuminsa na 2016. Cu e esfuersonan recien aki, e organisacion ta na caminda pa yega su meta ambicioso di 5,000 sterilisacion pa final di e aña 2023.

 

E cifranan aki ta representa mas cu djis un estadistica; nan ta representa un ola di beneficionan transformador pa comunidad di Aruba.

 

Pakico Sterilisacion Ta Importante

E problema di sobrepoblacion di cacho y pushi sin doño ta cuminsa cu puppies indesea. Door di sterilisa nos mascotanan, nos ta directamente ataca e problema central, reduciendo efectivamente e cantidad di animalnan cu lo por enfrenta un bida di negligencia, sin hogar, of algo pio. E intervencion crucial aki ta yuda stabilisa e poblacion di animalnan sin doño, asegurando cu menos animalnan ta sufri di e realidadnan duro di bida riba caya, manera hamber, enfermedad, y abuso.

 

Adicionalmente, prevencion ta un factor clave den mitiga varios retonan den nos comunidad. Esaki ta reduci e presion riba nos refugionan di animal y organisacionnan di rescate cu ya caba ta opera na nan capacidad maximo, asegurando cu nan por brinda miho cuido pa e animalnan cu nan ta rescata. Door di controla e poblacion di animalnan di caya, nos tambe ta alivia e carga riba recursunan gubernamental cu lo mester a wordo gasta pa maneha y atende cu problemanan relaciona cu nan. Esaki ta inclui spaarmento den esfuersonan di salubridad publico, seguridad, y limpiesa ambiental. Ademas, un poblacion di bestia controla ta nifica menos incidentenan, resultando den menos keho publico y tareanan administrativo pa autoridadnan local. Esaki tambe ta reduci e impacto ambiental y riesgonan di salubridad asocia cu un poblacion grandi di animalnan di caya, contribuyendo na un ambiente di bida mas limpi y sigur pa tur.

 

Ademas di e beneficionan pa comunidad y medio ambiente, controla e poblacion di cacho y pushi di caya pa medio di sterilisacion tin un efecto positivo y compasivo. Esaki ta resulta na menos caso di crueldad y abandono di animal, ya cu tin menos animalnan den dificultad riba caya. Esaki no solamente ta mehora e bienestar general di nos poblacion actual di cacho y pushi, pero tambe ta crea un sociedad mas humano y comprensivo.

 

Nos esfuersonan nacional di sterilisacion tambe ta mehora e posicion di Aruba como un paraiso turistico. Un compromiso visibel pa bienestar di animalnan no ta solamente refleha nos compasion cultural; esaki tambe ta resona cu e experiencianan y expectativanan di nos bishitantenan. Turismo, un arteria vital di nos economia nacional, ta florece riba e bunitesa y trankilidad di nos ambiente. E bista di animalnan sano y bon cuida den nos comunidad ta contribui positivamente na e experiencia total di cada turista.

 

Cada sterilisacion ta crea un comunidad mas responsabel, compasivo, prospero y un futuro unda cada cacho y pushi na Aruba por biba un bida saludabel y cuida, y nos sociedad por florece cu e conocemento cu nos tur ta parti di un mundo mas humano.

 

Registra Awo!

Fundashon Stimami Sterilisami ta invita henter pueblo di Aruba y organisacionnan boluntario di rescate pa forma parti di e mision importante aki. Registra bo mascotanan via www.stimamisterilisami.com y aprobecha di nos programa di subsidio, cual ta ofrece te cu 45% descuento riba e costo di proceduranan di sterilisacion. E meta di Stimami Sterilisami ta pa haci sterilisacion mas accesibel pa tur hende, asegurando un futuro mas saludabel y felis pa e mascotanan di Aruba y nos comunidad. Registra awe!