ORANJESTAD: E anochi mas grandi den deporte di Aruba ta tuma luga diabierna awo, unda
cu ta reconoce e atletanan cu mas a destaca den nan disciplina pa aña 2022. Un total di 130
atleta ta nomina den diferente categoria. Mester remarca cu e aña aki e interes ta hopi grandi,
un total di bintinuebe (29) federacion a manda nomber di nan atleta cu mas a sobresali.
Pa prome biaha ta introduci e categoria entrenado di aña unda cu lo reconoce bintishete (27)
entrenado pa nan contribucion den e desaroyo di deporte di Aruba.
Durante e anochi special aki ta rindi homenahe na dies (10) baluarte deportivo cu a dedica gran parti di nan bida na
deporte di Aruba. Tambe, shete (7) atleta olimpico lo ricibi un certificado y pin for di World
Olympians Association pa nan esfuerso haci pa promove e balornan olimpico.
E anochi di gala ta tuma luga diabierna, 10 di november den e luhoso Renaissance
Convention Center, cuminsando 8’or di anochi. Pueblo di Aruba ta keda cordialmente invita
pa sintonisa e anochi mas grandi den deporte di Aruba en bibo a traves di Canal 22 y pagina
di AWE24.COM.
