Calabas/Kudawecha – Shonnan, diasabra anochi 25 di november, cuminsando pa 8’or, la lucha continua! Team Sero Blanco ta purba nan suerte un biaha mas contra nan rival Team Snor, e ekipo cu biaha pasa a masacra Sero Blanco riba un 1 di april! Cos a bay brutal biaha pasa ora cu n’un moda sin precedente e trabuconan bou guia dje beruchte “Snor” Perez a pasa manera un wals di placha asfalt riba Sero Blanco.

E pregunta cardinal ta kico Sero Blanco por tin den tapara cu nan a tribi di reta Snor atrobe … seña nobo? Pildo di curashi? Carsonsio fura cu fiber? Wel fanaticonan di domino bush-bush, diasabra awor prepara pa otro sambombaso n’e unico y mundialmente famoso Domino Square Garden ora Team Sero Blanco saca nan arma nobo contra Team Snor! Manera di custumber, entrada ta bay ta completamente gratis y pasapalonan lo t’ey totalmente por nada! Bini un bini tur presencia e revancha di siglo entre Sero Blanco “All Stars” y Team Snor, diasabra awor 25 di november cuminsando pa 8’or di anochi.