Ayera marduga Wardacosta a haya un notificacion di Cuerpo Policial di Aruba cu personanan indocumenta a logra subi tera den area di Vader Piet. E dos personanan cu a duna e declaracion na un persona local, a indica cu nan a bini cu un lancha, pero esaki lo mester a bolter riba lama. Mesora Wardacosta a saca unidat di tera pa bai tira un bista den e area. Na yegada na e area panort di Aruba e agentenan di Wardacosta a detecta dos curpa sin bida den lama. A entrega e dos curpanan di hende muher sin bida na Cuerpo Policial di Aruba.

Despues di esaki Cuerpo Policial di Aruba a dirigi nan helicopter y Wardacosta tambe a dirigi su patruyanan di tera pa sigi cu e busceda pa mira si ta encontra mas persona. Durante e busceda ayera durante di dia a mira un curpa mas sin bida riba lama, pero no a logra saca e curpa aki for di lama.

Ayera, dialuna den oranan di anochi e helicopter di Wardacosta a saca un curpa di hende homber sin bida for di lama na parti nort di Aruba den e caso ariba menciona.

Awe, diamars parti mainta a bolbe haya un curpa sin bida den lama. Autoridadnan a logra saca e curpa y a entrega e na Cuerpo Policial di Aruba pa por sigi cu e investigacion den e caso aki. Di e ultimo curpa sin bida no tin informacion di e sexo. En total a haya entre ayera y awe 4 curpa sin bida riba lama.