ORANJESTAD: E luna aki e actividad di Ban Caya a tuma luga den e bario di Piedra Plat. Minister di Enseñansa y Deporte Endy Croes a asisti na Ban Caya Christmas Edition. E proyecto aki ta organisa pa CEDE Aruba, IBiSa y Gobierno di Aruba cu e meta pa reactiva e barionan, unda nan por pasa un dia cu nan sernan keri y conoce nan bario. E idea ta pa bay diferente bario di Aruba, unda cu cada bario ta haya oportunidad di mustra nan residentenan kico nan tin pa ofrece. Tabatin actividad deportivo, tent di artesania di Pasco, bus di salud, skina di wega pa mucha, show di Pasco y presentacion musical di Cas di Musica. E habitantenan di e bario di Piedra Plat por a comparti cu otro y pasa un rato ameno. Minister Endy Croes ta gradici CEDE Aruba, IBiSa y Gobierno di Aruba cu ta organisa e proyecto bunita aki. Alabes ta gradici Centro di Bario Piedra Plat y Fundacion Centro Famia Piedra Plat pa nan contribucion cu e proyecto aki den e bario di Piedra Plat.