ORANJESTAD: Recientemente, Minister Endy Croes a reuni cu presidente di Arubaanse Voetbal Bond (AVB) Sr. Randolf Lacle, unda a trata diferente tema di interes pa e deporte di futbol. Durante e encuentro, Minister Endy Croes a duna un avance di e proyecto di renobacion di Compleho Deportivo Guillermo Prospero Trinidad na Dakota. Ta planifica cu pa fin di luna di maart di e aña aki lo entrega e stadion bek. Minister Endy Croes a indica cu nan ta pendiente pa algun material cu mester yega di exterior, pero e ta bayendo riba bon caminda. Tambe, a trata e certificacion di e veld. Manera ta conoci, tabatin un certificado temporario pa e weganan por a tuma luga. Den luna di januari, FIFA a duna e bon noticia cu e stadion ta oficialmente certifica y ta warda pa e documentacion yega Aruba. Ademas di esaki, a trata e fondonan cu FIFA tin disponibel pa e desaroyo di futbol di Aruba, cual ta bay a traves di AVB y den colaboracion cu Gobierno di Aruba. Tin un proyecto caminda cu diferente miembro di futbol cu nan club lo haya yerbe artificial. E proyecto aki ta tuma luga e aña aki. Durante e encuentro a trata e proyecto cu Gobierno di Aruba y Lotto pa Deporte, cual ta encera renobacion di tur luz LED ultramoderno di diferente veld di, entre otro, futbol, baseball y softball. Mandatario di Deporte a informa presidente di AVB con leu ta cu e proyecto aki. E programa – y rapportnan ta riba mesa y programa ta riba mesa. Awo e companianan mester ofrece e calidad cu ta exigi pa despues tuma un desicion y cuminsa cu e proyectonan aki. Nos por mira atras riba un bon reunion cu AVB, unda a brinda informacion actualisa y elabora riba diferente proyecto.