Diahuebs anochi a drenta informe di cu lo tin un “roadrage” riba Watty Vos Boulevard cu a termina cu intento di assesinato dilanti Cadushi Supermarket na Tanki Leendert. Segun informacion a bin compronde cu riba Watty Vos Boulevard un auto oranje lo a cambia lane sin pone signlight y un motociclista den e lane a flash e auto, cu despues a hala bek den e lane y e motociclista a mustra un señal pa bis’e pa pone signlight. E motociclista a sigui core bai pero e auto a sigui su tras, trot y hera dal’e. E motociclista su helm tabata tin Bluetooth y cu esaki e a yama polis. Yegando banda di Cadushi Supermarket na Tanki Leendert e motorciclista cu tabata na telefon cu polis a baha caminda y e auto a core para banda di dje. E chauffeur di e auto oranje a baha for di e auto cu un obheto y a bay bringa cu e motociclista. Polis a yega na e sitio y mesora a detene e chauffeur di e auto oranje y a transporte pa Warda di Polis. Polis tambe a tuma datos di e susedido aki.