ORANJESTAD: Recientemente, Minister di Enseñansa y Deporte Endy Croes a reuni cu Sr. Junny Figaroa, kende ta e director actual di Fundacion Lotto pa Deporte Aruba (FLPD). Durante e reunion aki, Sr. Juni Figaroa a trece algun novedad en cuestion e traspaso di Lotto pa Deporte pa Fundacion Lotto pa Deporte y den esaki ricibi Jaarrekening cu ta di vital importancia pa e traspaso tuma luga. Jaarrekening 2020 a keda cla na final di december 2023. Sr. Figaroa a indica cu ta trahando duro pa finalisa Jaarrekening 2021 den e luna di februari y den e luna di maart termina Jaarrekening 2022. Banco ta den espera di esakinan pa asina haci e traspaso di CBN Aruba y CBN pa Fundacion Lotto pa Deporte Aruba bek. Sr. Figaroa a duna un splicacion amplio di e proceso y tur e trabounan cu a tuma luga riba nivel di e comision cu ta trahando riba esaki, basa riba un contract cu ya ta firma caba desde inicio di aña 2023. Asina cu cumpli cu tur Jaarrekening, ta actualisa cu tur banco y cumpli cu tur locual a palabra den e contract, Canadian Bank Note (CBN) y CBN Aruba por haci traspaso di e operacion completamente den man di Fundacion Lotto pa Deporte bek. Finalmente, e mandatario di Deporte a indica cu e tabata un tremendo reunion, unda a haci algun palabracion concreto pa e traspaso di Lotto pa Deporte tuma luga dentro di poco.