Djabièrnè 5 di aprel 2024 den oraranan di mainta Wardakosta a haña notifikashon ku tin
un boto tipo yola ku lo a subi barankanan na ostpùnt den area di Hambrak. Mesora
Wardakosta a mèldu e informashon akí na Kuerpo Polisial di Kòrsou i huntu e
outoridatnan a manda patruyanan na tera di Wardakosta, miembronan di warda di polis
di Montaña i unidatnan di U.S.T. i e helikòpter di Wardakosta den direkshon di e sitio.
Durante e búskeda, ku a dura henter dia, riba tera a detené den oranan di mainta seis
(6) indokumentado. Den e área a enkontrá un tas, den kua tabatin arma di kandela.
Den oranan di atardi i anochi Wardakosta i Polis a laga e helikòpter i patruyánan den e
área i a bin topa ku shete (7) indokumentado mas. Na tur a detené 13 persona
indokumentá, di kual 7 hende hòmber i 6 hende muhé. Un di e hendenan muhénan ta
trata di un menor di edat. Ta trata di diesdos (12) persona di nashonalidat Venezolano i
un (1) Colombiano.
Den e grupo di indokumentadonan aki, tin persona ku ya kaba den pasado a keda
deportá for di nos isla i tambe un dama, ku a keda sentensiá pa trafikashon di hende.
Tur e personanan aki a ser entregá na Departamento di Imigrashon, ku lo kontinuá ku e
investigashon den e kaso akí.