Despues di 7 aña Weganan Interinsular ta bek y ta di aplaudi tur e trabounan haci pa nos muchanan y deporte.

 ORANJESTAD: Recientemente, delegacion di Aruba a biaha pa nos hermana isla Curaçao pa competi den Weganan Interinsular 2024 cu ta tuma luga di 11 pa 14 di april. Manera ta conoci, na aña 2022, Minister Endy Croes hunto cu Minister di Enseñansa, Ciencia, Cultura y Deporte di Curaçao Sr. Sithree van Heydoorn y diputado di Infrastructura y Deporte di Boneiro e tempo ey Sr. James Kroon a firma un acuerdo pa reinicia Weganan Interinsular despues di shete (7) aña entre Aruba, Boneiro y Curaçao. Na aña 2023 Weganan Interinsular a inicia cu 6 disciplina y na aña 2024 Weganan Interinsular a aumenta pa 9 disciplina. Weganan Interinsular ta inicia na Aruba dia 1 pa 3 di maart den e disciplina di trefbal, dam y ahedres. Despues di esaki, Weganan Interinsular a continua na Boneiro di 14 pa 17 di maart, unda cu e mucha- y hobennan a participa den e disciplina di basketball, aquatlon y futbol. Diahuebs mainta, un delegacion di 37 persona a sali pa e competencia di Weganan Interinsular na Curaçao: 12 atleta di atletismo, 4 atleta di basketball, 10 atleta di volleyball y un total di 11 delegado y/of coach. Pues, e fin di siman aki, e hobennan ta competiendo den e disciplina di basketball, atletismo y volleyball. Minister Endy Croes a biaha diabierna mainta pa presencia e clausura di Weganan Interinsular 2024. Minister Endy Croes ta gradici IBiSA, FDDK y INDEBON pa nan tremendo colaboracion pa realisa e gran evento deportivo aki. Por ultimo, mandatario di Deporte ta desea tur scol cu ta participa den e competencia escolar aki hopi exito. Cu deseo, dedicacion, determinacion y disciplina ta logra.