Diasabra madruga durante e Ronde van Aruba a drenta informe di un accidente cu hende herida pariba di airport, mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un accidente unda un chauffeur burachi a bay dal fuertemente tras di 2 ciclista cu tabata compañando un di e participantenan den e Ronde van Aruba. Polis a nota cu e chauffeur ta burachi y a detene. E ciclistanan a cay y a haya basta sla. Na yegada di e ambulans nan a atende e prome victima mas seriamente herida y a pidi un otro ambulans pa e otro. Un rato despues e otro ambulans a yega ora nan a bay transporte pa hospital un di esnan cu a mira e accidente a bira basta malo y a pidi pa un otro ambulans p’e. Despues di un rato un di tercer ambulans a presenta. Mirando e gravedad di e accidente polis a pidi presencia di e investigadornan technico y forensyco pa bini na e sitio y documenta e accidente aki.