ORANJESTAD –Pa aporta y stimula comunidad pa semper keda den movecion, WEB Aruba awe mainta a anuncia hunto cu Patrishi Sports, e WEB Walk & Run 2025. Registracion pa e evento ya ta posibel pa adulto, hoben y mucha. E evento pa runners y walkers lo tuma luga dia 31 di augustus proximo. E distancia pa adulto ta 5KM. Pa hoben y mucha tin diferente distancia a base di edad y tur cay den ranking di Patrishi Sports. Durante e conferencia di prensa Rammy Ramada di Patrishi Sports a otorga BIB #1 na Asja Dongen, relacionista publico di WEB. Manera di custumber, e BIB #1 ta wordo reserva pa pone un persona den spotlight. Pronto WEB lo sorpresa un persona cu e BIB aki pa asina pon’e merecidamente den spotlight.
Pa decadanan largo WEB ta aporta na e deporte di core y cana pa medio di sponsoring y di awa. Tambe WEB a organisa su propio kwart marathon & 10km na aña 2018. Participacion ta na rason di Awg. 20,- pa adulto y Awg. 10,- pa hoben y mucha. Registracion ta habri pa tur walker y runner, pero tambe pa esnan cu ta cana pa placer. Por registra online via www.webarubarun.com . Corda cu registracion online so, sin pago, no ta valido.
Ankle Bands y Hot-Cold Pack
Aparte di winners medals, lo tin premio atractivo pa overall winners di adulto y pa hoben y mucha. Lo tin doorprize y goody bags cu un reflective ankle band y un hot-cold pack pa tur participante cu yega finish line.
Ruta
E ruta di 5KM pa adulto lo start dilanti WEB, pasa riba brug di Spaans Lagoen bay direcion di Telearuba sigui pasa dilanti Colegio Santa Famia. Akinan ta bay zuid sigui riba e caminda di Pos Chikito te ora cu yega na altura di Pos Chikito 70-E cual ta e turning point. Akinan ta crusa riba e otro banda di caminda cu ta Spaans Lagoenweg, bay bek direcion di Mangel Halto, Wattstraat, pasa Marina Pirata te ora cu yega bek na caminda grandi net prome cu TeleAruba y Casa Cuna. Na e crusada di caminda grandi aki ta bay bek direccion di e brug di Spaans Lagoen y finish bek dilanti di WEB. E caredanan pa hoben y mucha lo core den un solo liña stret pa finish riba e mesun ruta di adulto, pero pa distancianan di 3KM, 1500 m y 800, 400 y 200 meter. Pa e caredanan di 3 KM y 1500 M, lo transporta e participantenan cu bus na e diferente puntonan di salida cual lo ta riba e mesun ruta di 5KM. Muchanan di 200, 400 y 800 m lo cana cu boluntarionan pa nan punto di salida.
Ambiente safe y ameno
Ora organisa un caminata di e taya aki, tin hopi organisacion y boluntario ta yuda pa crea un ambiente ameno y safe pa participantenan por haci nan deporte sin ningun preocupacion. Di ekipo pa track e prestacion di e participantenan, pa fruta y awa, pa guia canto di ruta, servicio di prome auxilio, baricada canto di caminda pa siguridad di e participantenan, water post, toilet y barinan pa tene tur cos limpi, tur esaki ta rekeri esfuerso, gasto y bon coordinacion! ‘P’esey for di awor un palabra di danki na tur organisacion y boluntario envolvi pa e esfuerso pa haci e WEB Walk & Run un exito rotundo.’, asina PR di WEB Aruba, Asja Dongen a finalisa.
