2 di december 2025
Recientemente Directora di Departamento di Asunto Social (DAS), sra. dr. Rosanna van Dijk,
hunto cu tur empleado cu ta traha na oficina principal, a ricibi e certificado oficial di ISO-9001.
Esaki ta un logro importante cu ta representa un paso grandi den desaroyo di nos organisacion y e
calidad di servicio cu nos ta brinda nos clientenan.
E certificado a wordo entrega personalmente door di sr. Marc van Rosmalen, cu a biaha for di
Hulanda pa entrega esaki den un manera oficial y significativo. E reconocemento aki ta mustra
claramente cu ora nos propone meta grandi y traha hunto riba dje, nos por yega un nivel
internacional di calidad y profesionalismo.
Na november 2023, bou guia di sr. Marc van Rosmalen, un experto riba e materia cu a duna
direccion, claridad y structura den tur fase di e proceso, DAS a inicia un trayecto intensivo di casi
dos aña pa cumpli cu tur standard internacional di calidad cu ISO-9001 ta pidi. Esaki no tawata
solamente un proceso tecnico, pero tambe un proceso humano di cambio den cultura
organisacional. Durante e trayecto a enfoca riba cinco balor nucleo: confiansa, envolvimento,
comunicacion, colegialidad y responsabilidad. E proceso aki a duna e oportunidad pa evalua y
mehora e manera di traha, fortalece e clima di trabou y hisa e nivel di nos organisacion. For di DAS,
nos colega sr. Efraim Suurendonk tawata encarga cu e coordinacion di e proceso pa sigura cu tur
seccion tin un papel activo.
Den juni 2025, DAS a ricibi e notificacion cu nos departamento a pasa tur evaluacion y
oficialmente a wordo certifica. Pa nos esaki ta un extra push pa como departamento mantene nos
clientenan central, pa nos sigui mehora y aporta na bienestar di nos comunidad.